“O‘zbekiston temiryo‘llari” sovutgichli (refrijeratorli) vagonlar tashuvi uchun 75 foizgacha chegirmalar taqdim etilmoqda. Bu haqda 16-aprel kuni AOKAda bo‘lib o‘tgan brifingda ma’lum qilindi.
Brifingda ma’ruza qilgan “O‘zbekiston temiryo‘llari” AJ boshqarma boshlig‘i Umidilla Ibragimovning ta’kidlashicha, meva-sabzavotlar, go‘sht mahsulotlari kabi tez buziladigan yuklar eksporti uchun mo‘ljallangan sovutgichli (refrijeratorli) vagonlar mavjud.
Bir vagon sig‘imi 45 tonnaga yetadi. Refrijeratorli vagonlarda tashilayotgan yuk hajmini oshirish va amaldagi murakkab vaziyatni inobatga olgan holda, hozirda faqatgina refrijeratorli vagonlar tashuvi uchun 75 foizgacha chegirmalar taqdim etilmoqda.Shuningdek, eksport-import tashuvlar nafaqat temiryo‘l orqali balki temiryo‘l va kema orqali, Trans-Kavkaz koridori bo‘yicha multimodal usulda ham amalga oshirilmoqda. Bu usulda yuklar asosan Qozog‘istonning Aqtau so‘ng Ozarbayjonning Boku porti orqali Gruziya va Turkiyaga yetkazib berilmoqda.
Temiryo‘l orqali tashilayotgon eksport hajmi 1-chorakda o‘tgan yilning mos davriga nisbatan 12 foizga oshdi va 2,3 million tonnaga etdi. Import hajmi ham 1-chorakda o‘tgan yilning mos davriga nisbatan 5,6 foizga o‘sib, yil yakuniga qadar 13 million tonnaga yetishi kutilmoqda.
Umidilla Ibragimov, “O‘zbekiston temiryo‘llari” AJ boshqarma boshlig‘i
Shuningdek, brifingda Turkmaniston, Ozarbayjon, Gruziya va Turkiya temiryo‘l ma’muriyatlari bilan kelishuv doirasida O‘zbekiston–Turkiya konteyner tashuvlari qatnovi yo‘lga qo‘yilgani haqida ma’lumot berildi.
“Bu yo‘nalishda 1-aprel kuni yuborilgan birinchi konteyner poyezdi 13-aprel kuni Turkiya yetib borgan. Bunda 20 futlik va 40 futlik konteynerlar uchun o‘rtacha tashuv narxlari mos ravishda 2 300 va 3 000 AQSh dollarini tashkil qilmoqda”, — dedi Ibragimov.Uning qo‘shimcha qilishicha, shu yo‘nalishda, konteyner eksporti tez va sifatli bo‘lib, ayniqsa to‘qimachilik mahsulotlari uchun so‘rovning keskin ortishi kutilmoqda.
Izoh (0)