O‘zbekistonda joriy qilingan karantin choralari sababli gaz hisoblagichlarini davlat qiyoslovidan o‘tkazish bo‘yicha iste’molchilar arizalarini ko‘rib chiqish 2020-yilning 1-sentabriga qadar uzaytirildi. Bu haqda “Hududgazta’minot” AJ tomonidan ma’lum qilindi.
Xabar berilishicha, bu qaror Inqirozga qarshi kurashish respublika komissiyasining 2020-yil 14-aprel kuni bo‘lib o‘tgan yig‘ilishida qabul qilingan. Undan ko‘zlangan maqsad gaz ta’minoti tashkiloti xodimlarining iste’molchilar bilan xavfsiz aloqa qilishi hamda koronavirus infeksiyasiga qarshi kurash davrida fuqarolar va ishchi xodimlarning hayoti va sog‘lig‘ini muhofaza qilish hisoblanadi.
Bunda istisno tariqasida gaz ta’minoti tashkiloti tomonidan muddati o‘tgan qiyoslov sertifikatiga ega gaz hisoblagichlari ko‘rsatkichlarining tegishli hisobotlarda inobatga olinishiga ruxsat etiladi.
Kompaniya tomonidan qayd etilishicha, O‘zbekiston Prezidentining 2019-yil 9-iyuldagi PQ-4388 sonli qarori doirasida “Hududgazta’minot” AJga gaz nazoratining avtomatlashtirilgan hisobga olish tizimini tatbiq qilish vazifasi yuklatilgan. Bu tizimda iste’molchilarga gaz hisoblagichlarini bepul o‘rnatib berish ko‘zda tutilgan.
Avvalroq Yunusobodda elektr energiyasidan foydalanish bo‘yicha sinov tariqasida o‘rnatilgan me’yorlar karantin sababli bekor qilingani haqida xabar berilgan edi.
Izoh (0)