O‘zbekistonda karantin davrida shaxsiy avtomobildan foydalanish tartibi yengillashtirilishi mumkin. Bu haqda O‘zbekiston bosh vaziri o‘rinbosari Jamshid Qo‘chqorov 15-aprel kuni bo‘lib o‘tgan brifingda ma’lum qildi.

Jamshid Qo‘chqorov.

Kadr: “O‘zbekiston 24”

“Kuni kechadan boshlab O‘zbekiston hududida yuk avtomobillariga bo‘lgan cheklovlar to‘liq olib tashlandi. Demak, hamma tadbirkorlar, korxonalarning bir-biriga yuk yuborish imkoniyati kechagi kundan boshlab to‘liq erkinlashtirildi. Hech qanday muammo yo‘q.

Tadbirkorlarimiz ko‘plab murojaatlar bilan chiqishyapti. Ularning aksariyat mashinalari shaxsiy, shaxsiy mashinaga esa ruxsat yo‘q, faqat tashkilotlarning mashinalariga stiker berilyapti. Shu nuqtai nazardan bu masala bo‘yicha ham bir-ikki kun ichida bosh vazirimiz rahbarligidagi komissiyaning qarori chiqadi, buni ham yengillashtiramiz”, — dedi Jamshid Qo‘chqorov.

Avvalroq Jamshid Qo‘chqorov O‘zbekistondagi karantin tartibi may oyida ham davom etishi ehtimoli katta ekanligini ma’lum qilgani haqida xabar berilgan edi.