Karantin paytida futbol o‘yini tashkil qilgan marg‘ilonlik fuqaro 15 sutkaga qamaldi, deya xabar bermoqda “Daryo” muxbiri Azizjon Ermatov.
Ma’lum bo‘lishicha, Marg‘ilon shahrida yashovchi 1995-yilda tug‘ilgan F.D. 10-aprel, juma kuni, soat 19:00 larda yashash xonadoni oldida o‘rtoqlari bilan futbol o‘yini tashkil qilgan. O‘zi ham mazkur o‘yinda niqobsiz ishtirok etgan.
Profilaktika inspektori bu holatdan xabar topib, ularning oldiga borgan. Karantin davrida sport o‘yinlari tashkil etish va jamoat joyida niqobsiz yurish mumkin emasligini tushuntirib, darhol niqob taqib olish zarurligini talab qilgan.
F.D. ichki ishlar xodimining gapiga quloq solmasdan boshqa fuqarolarning e’tiborini jalb qilib, uyatli so‘zlar bilan so‘kinib, baqir-chaqir qilgan. Bu ham yetmaganidek, u niqob taqib olishi lozimligi haqidagi talabga bo‘ysunmagan.
Marg‘ilon shahar ma’muriy sudi tomonidan mazkur huquqbuzarlik ishi ko‘rib chiqilib, F.D.ga 15 sutka ma’muriy qamoq jazosi tayinlangan.
Shuningdek, bazaviy hisoblash miqdorining bir baravari miqdorida jarima jazosi qo‘llanilib, qamoq xarajatlari undirilishi belgilandi.
Izoh (0)