2017-yil 23-mayida “Real” klubi Braziliyaning “Flamengo”sidan Vinisius Junior ismli hali 17 yoshga ham to‘lmagan futbolchi bilan shartnoma imzolaganini e’lon qildi. Klub uning uchun 45 million yevro to‘lashi aytildi. Faqat u klubga 18 yoshga to‘lgan vaqtda kelishi ma’lum qilindi. 2018-yil 20-iyunida “Qirollik klubi” futbolchisi sifatida tanishtirilgan Vinisius hech qancha o‘tmay asosiy jamoa bilan mashg‘ulotlarni boshladi. Sekin-asta asosiy tarkibda ko‘rinish bera boshlagan futbolchining harakatlari muxlislarda katta qiziqish uyg‘otdi. Ammo futbolchining Ispaniya poytaxtidagi dastlabki mavsumi ko‘ngidagidek kechmadi. “Real” ham o‘sha mavsumda hech bir karomat ko‘rsat olmaganini qayd etish lozim. Zinedin Zidan “Real”ga qaytdi. Eden Azar sotib olindi. Hammasi Vinisius uchun qaytadan boshlandi. 2019-yil noyabriga qadar futbolchiga juda kam o‘yin daqiqalari berildi. Ammo Eden Azarning safdan chiqishi, Vinisiusga yana bir imkon taqdim etdi. U esa bundan unumli foydalanishni boshladi. Hatto “El-Klasiko”da “Barselona” darvozasiga gol ham urdi. Ammo koronavirus pandemiyasi sabab Vinisiusning hali boshlanmagan ertagi noma’lum muddatga to‘xtab qoldi. Bir qancha vaqt muqaddam Esporte Interativo nashri Madrid yetakchisi bo‘lishga intilayotgan yosh yulduzdan intervyu oldi. “Daryo” esa ushbu suhbatni o‘zbek tilida taqdim etadi.

Ma’lumot uchun, intervyu olingan vaqtida Amerika Kubogi, Olimpiada o‘yinlari kabi musobaqalar hali qoldirilgan emasdi. 

Foto: “Real”

— Amerika Kubogi va Olimpiada o‘yinlari haqida

“Agar imkoniyati bo‘lsa, ikkala musobaqda ham qatnashgan bo‘lardim... Ammo bu Olimpiadada qatnashishim uchun so‘nggi imkoniyat. Unda qatnashib, g‘olib chiqqan holda terma jamoa tarixida qolmoqchiman”.

— “Real” uni Olimpiada o‘yinlariga qo‘yib yuboradimi?

“Bilmadim, bu haqida gaplashganimiz yo‘q. Keyinroq hamma uchun eng yaxshi variantni tanlaymiz”.

— Madridda birinchi mavsum haqida

“Juda xotirjam edim: oilam yonimda, faqat klub va o‘yinim haqida o‘ylayman. O‘tgan mavsum men uchun yaxshi o‘tgandi. Boisi ko‘proq maydonga tushdim. Yangi mavsum startida esa o‘yin amaliyoti kamligi sabab qiynaldim. Biroq klub har doim meni qo‘llab-quvvatladi. Shuning uchun ham xotirjamlikni saqlab qoldim. Imkoniyat berilishini bilardim. Muhim o‘yinlar boshlanishi bilan hammaga imkoniyat berilishi tabiiy edi”.

— Ijaraga berilishi mumkinligi haqida

“Bunday narsa xayolimga ham kelmagan. Futbolda hamma narsa bir daqiqa ichidayoq o‘zgarib ketishi mumkin. Shu sababdan doim xotirjamlikni saqlab kelaman. Ba’zan klubni o‘zgartirish haqida o‘ylab qolasan, ammo bu ishni mavsum o‘rtasida qilish muammo. Hech qachon “Real”dan ketishni istagan emasman. Dunyoning eng yaxshi futbolchilari bilan yonma-yon yaxshi o‘yin ko‘rsatish uchun borimni beraman. Boshqa klubga o‘tgandan naf yo‘q. Chunki mashg‘ulotlar va o‘yin darajasi “Real”nikidan pastroq bo‘ladi”.

— Qiyin vaziyatlarda Zidan bilan munosabatlari haqida

“Zidan har doim menga ishonch bag‘ishlab turadi. Imkoniyat paydo bo‘lganda xayol har xil keraksiz narsalardan xoli bo‘lishi uchun doim xotirjamlikni saqlab qolish lozimligini aytadi. Meni o‘yinda ekanligimni qayd etadi. Zizu doim yordam beradi.

— Zidanning ishonchi haqida

Foto: “Real”

“Zidan barcha futbolchilarga ishonadi. Agar futbolchi o‘ziga ishonmayotgan bo‘lsa ham buni Zidan o‘zgartiradi. Maydonga har doim bir xil tarkib tushmaydi”.

— O‘yinlar tahlili haqida

“Zidan o‘yinlar videotasvirini qo‘yib berib, futbolchilar nimani yaxshi, nimani yomon qilganini va nimalarni yaxshilash kerakligini tushuntiradi. Bunday narsalar ustida ishlayotganimiz juda yaxshi, albatta. Men ham bu orqali o‘zimdagi farqlarni ko‘raman. O‘sayotganligimni, jamoaga yordam berayotganligimni, jamoa esa menga katta ko‘mak ko‘rsatayotganini tushunaman. Joriy mavsum boshqalarga qaraganda juda kam gol o‘tkazyapmiz. Natijalardan ham buni bilsa bo‘ladi”.

— Kiyim almashtirish xonasidagi qo‘llab-quvvatlov haqida

“Braziliyaliklar — Marselo, Kazemiro, Militao, Rodrigo... Doim bir-birimizni qo‘llab-quvvatlaymiz. Bu esa bizga bizga xotirjamlikni saqlab qolishga yordam beradi. Chunki aytganlaridek, bu yerga bo‘lishdan ko‘ra, bu xonada qolish qiyinroq”.

— “Xetafe”ga qarshi bahsdan so‘ng tanqidlar haqida

“Yugurish uchun maydon chetiga bordim. 8 marta yugurishni takrorlashim kerak edi. Men esa buni ertaga tongda qilishimni murabbiyga aytdim. Odamlar esa meni mashg‘ulot o‘tkazishdan bosh tortganim haqida gapirdi. Ammo men uyda mashg‘ulot o‘tkazgandim. Shuningdek, o‘yindan so‘ng albatta yugurishni amalga oshirish shart emas”.

— Neymarning Olimpiadada ishtirok etishni xohlayotgani va uning Amerika Kubogida ko‘proq kerakligi haqida

“Ikkala tarafda ham, umuman, Neymarning har bir o‘yinda yo‘qligi bilinadi. U ikkala musobaqada ham o‘ynashi va jamoaga yordam berishi mumkin”.

— Neymar va “Oltin to‘p” haqida

“Neymar dunyoning eng yaxshi o‘yinchisi bo‘lishga munosib. Agar jarohatlar bo‘lmasa va yetarlicha o‘yin amaliyotiga ega bo‘lsa, u ko‘plab sovrinlarni yutishi mumkin. U bilan birga to‘p surish ajoyib axir”.

— Qiyin vaziyatlardagi xarakteri haqida

“Agar baxtli bo‘lsang, vaziyat qanday bo‘lishidan qat’i nazar dunyoga kulib boqasan va yana nimanidir o‘rganishni xohlaysan. Bular va oilam yonimdaligi har doim menga yordam bermoqda”.

— Ulg‘ayotgani haqida

Foto: Getty Images

“Men “Real”da tajribali futbolchilar, barcha sovrinlarni yutib bo‘lgan afsonalar bilan birga to‘p tepyapman. Ammo ular hamon g‘alaba ishtiyoqini saqlab qolgan va ko‘proq g‘olib bo‘lishni istaydi. Ular men va Rodrigoga yordam beryapti. Rodrigo va Militaoning Madridga kelganiga ko‘p bo‘lgani yoq‘. Biroq ular ham ancha oldin kelganlarga o‘xshaydi. Ular ham jamoaning bir qismi bo‘lib qolish, ko‘proq g‘alaba qozonishni xohlamoqda”.

— OAV va Vinisius

“Qarashlar juda tez o‘zgarishini guvohi bo‘lyapman. Noyabrda mavsumning eng yomon o‘yinchilardan biri edim. Hozir (fevral) esa eng yaxshilaridan biri”.

— Mashg‘ulotlar haqida

“O‘z ishingni ko‘ngildagidek bajarishga, mashg‘ulotlarda bor kuchingni sarf etishga bor diqqat-e’tiborni jalb qilish lozim”.

— Mashg‘ulotlarning o‘yinlardagi yordami haqida

“Ha, mashg‘ulotlarning yordami biroz tegadi. Ammo ularni o‘yinlar bilan tenglashtirib bo‘lmaydi. O‘yin vaqti gol ura olsang, o‘zingga bo‘lgan ishonch juda tez qaytadi”.

Rodrigo haqida

“Madrid”da hamma uchun joy bor. Bu murabbiylar uchun ham, futbolchilar uchun ham birdek qiyin. Zidan shu boisdan rotatsiyaga ko‘p qo‘l uradi. Shundan olib qaralsa, hammamizda o‘yin vaqti deyarli teng chiqadi. Rodrigo bilan bir-birimizga yordam beryapmiz. Braziliyadaligimzdayoq do‘st edik. U bilan bu yerda ham terma jamoada ham birga to‘p tepishni istayman”.

— Azarning jarohatdan tuzalib qaytishi va asosiy tarkibdagi joyini qaytarib olishi haqida

“Azarning qaytayotganidan xursandman. Bu esa Zidan yana bir futbolchidan foydalanishi mumkinligini anglatadi. Biz keyingi o‘yinlarda shunday yuqori darajadagi futbolchi bizga qanchalik kerak bo‘lganini ko‘ramiz. U mavsum so‘ngida bizga katta ko‘mak beradi. Hal qiluvchi pallada barcha futbolchilar o‘z jismoniy holatining cho‘qqisida bo‘lishini istaymiz”.

— O‘ng qanotdagi o‘yini haqida

“Bir xil o‘yin ko‘rsata olmayman. Shuning ustida ishlashim kerak. Boisi avval hech qachon o‘ng qanotda o‘ynashimga to‘g‘ri kelmagan. “Real”da esa bu holatga bir necha bor tushdim. Chap qanotda nima qilish kerakligini yaxshi bilaman, o‘ngda esa bu qiyinroq”.

— “Bernabeu”dagi muxlislar haqida

“O‘tgan mavsum so‘ngida to‘p kelib tushgach, raqib maydoni tomon harakatlangan vaqtim muxlislarga bu holat yoqib, meni qo‘llab-quvvatlagandi. Ular bu ishni qilib, meni g‘oyatda baxtli qilgan edilar. Men ham ko‘plab gollar urib, “Madrid” bilan ko‘plab sovrinlarni yutgan holda jamoa g‘alabalariga o‘z hissamni qo‘shishni istayman”.

— Tanqidlar haqida

“Boshlang‘ich bosqichda ko‘plab gollar urasan. Ammo professional bosqichda gollaring sezilarli darajada kamayadi. Bu oson emas, biroq men endigina 19 yoshdaman. Tajribali futbolchilarning yordami sabab yanada kuchliroq bo‘lib boryapman. Shu jihatdan men Rahim Sterlingga o‘xshayman. U ham mening yoshimda xuddi shunday o‘yin ko‘rsatgandi. Ammo hozir u ko‘plab gollar urmoqda. Hatto o‘tgan mavsumdagidan ham. Vaqti kelsa, gollar ham keladi. Zidan mashg‘ulotlarda men bilan ishlamoqda, hujumni qanday yakunlash borasida yordam bermoqda. Murabbiying sobiq futbolchi bo‘lsa, bu ko‘p narsani anglatadi, maydonda ham, undan tashqarida ham”.

— Jamoaga yangi kelgan Reyniyer haqida

“Endi yonimizda braziliyalik yana bir futbolchi bo‘ladi”.

— Unga maslahatlar

“Kuchliroq bo‘lish uchun avvalosi Raul boshchiligidagi “Kastilya”dagi o‘yinlariga diqqatini qaratishi lozim. Unda moslashish uchun 4 oy bor”.

— Braziliya terma jamoasi haqida

“Terma jamoa ro‘yxatida bo‘lishni xohlayman, orzu qilaman. Rodrigo, Militao va Kazemiro ham”.

Blits savol-javoblar:

— “Flamengo”

“Jamoa ko‘plab sovrinlari yutadi deb umid qilaman”.

— Mundial yoki Chempionlar Ligasi

“Ikkalasi ham”.

— Chempionlar Ligasida penaltini tepish yoki Ramosga berish

“Ramosga beraman”.

— Kazemiroga qarshi birga-bir o‘ynash, yoki to‘pni himoya qilish

“Kazemiroga qarshi birga-bir o‘ynash, faqat mashg‘ulotlarda”

— Nima qiyinroq: Marselodek to‘pga egalik qilish, yoki mashg‘ulotlardagidek boshqarish

“To‘pga egalik qilish”

— Marselo

“Kumirim”.

— Kazemiro

“Kazemif”.

Foto: “Tribuna.com”

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!