2017 йил 23 майида «Реал» клуби Бразилиянинг «Фламенго»сидан Винисиус Жуниор исмли ҳали 17 ёшга ҳам тўлмаган футболчи билан шартнома имзолаганини эълон қилди. Клуб унинг учун 45 миллион евро тўлаши айтилди. Фақат у клубга 18 ёшга тўлган вақтда келиши маълум қилинди. 2018 йил 20 июнида «Қироллик клуби» футболчиси сифатида таништирилган Винисиус ҳеч қанча ўтмай асосий жамоа билан машғулотларни бошлади. Секин-аста асосий таркибда кўриниш бера бошлаган футболчининг ҳаракатлари мухлисларда катта қизиқиш уйғотди. Аммо футболчининг Испания пойтахтидаги дастлабки мавсуми кўнгидагидек кечмади. «Реал» ҳам ўша мавсумда ҳеч бир каромат кўрсат олмаганини қайд этиш лозим. Зинедин Зидан «Реал»га қайтди. Эден Азар сотиб олинди. Ҳаммаси Винисиус учун қайтадан бошланди. 2019 йил ноябрига қадар футболчига жуда кам ўйин дақиқалари берилди. Аммо Эден Азарнинг сафдан чиқиши, Винисиусга яна бир имкон тақдим этди. У эса бундан унумли фойдаланишни бошлади. Ҳатто «Эль-Класико»да «Барселона» дарвозасига гол ҳам урди. Аммо коронавирус пандемияси сабаб Винисиуснинг ҳали бошланмаган эртаги номаълум муддатга тўхтаб қолди. Бир қанча вақт муқаддам Esporte Interativo нашри Мадрид етакчиси бўлишга интилаётган ёш юлдуздан интервью олди. «Дарё» эса ушбу суҳбатни ўзбек тилида тақдим этади.
Маълумот учун, интервью олинган вақтида Америка Кубоги, Олимпиада ўйинлари каби мусобақалар ҳали қолдирилган эмасди.
— Америка Кубоги ва Олимпиада ўйинлари ҳақида
«Агар имконияти бўлса, иккала мусобақда ҳам қатнашган бўлардим... Аммо бу Олимпиадада қатнашишим учун сўнгги имконият. Унда қатнашиб, ғолиб чиққан ҳолда терма жамоа тарихида қолмоқчиман».
— «Реал» уни Олимпиада ўйинларига қўйиб юборадими?
«Билмадим, бу ҳақида гаплашганимиз йўқ. Кейинроқ ҳамма учун энг яхши вариантни танлаймиз».
— Мадридда биринчи мавсум ҳақида
«Жуда хотиржам эдим: оилам ёнимда, фақат клуб ва ўйиним ҳақида ўйлайман. Ўтган мавсум мен учун яхши ўтганди. Боиси кўпроқ майдонга тушдим. Янги мавсум стартида эса ўйин амалиёти камлиги сабаб қийналдим. Бироқ клуб ҳар доим мени қўллаб-қувватлади. Шунинг учун ҳам хотиржамликни сақлаб қолдим. Имконият берилишини билардим. Муҳим ўйинлар бошланиши билан ҳаммага имконият берилиши табиий эди».
— Ижарага берилиши мумкинлиги ҳақида
«Бундай нарса хаёлимга ҳам келмаган. Футболда ҳамма нарса бир дақиқа ичидаёқ ўзгариб кетиши мумкин. Шу сабабдан доим хотиржамликни сақлаб келаман. Баъзан клубни ўзгартириш ҳақида ўйлаб қоласан, аммо бу ишни мавсум ўртасида қилиш муаммо. Ҳеч қачон «Реал»дан кетишни истаган эмасман. Дунёнинг энг яхши футболчилари билан ёнма-ён яхши ўйин кўрсатиш учун боримни бераман. Бошқа клубга ўтгандан наф йўқ. Чунки машғулотлар ва ўйин даражаси «Реал»никидан пастроқ бўлади».
— Қийин вазиятларда Зидан билан муносабатлари ҳақида
«Зидан ҳар доим менга ишонч бағишлаб туради. Имконият пайдо бўлганда хаёл ҳар хил кераксиз нарсалардан холи бўлиши учун доим хотиржамликни сақлаб қолиш лозимлигини айтади. Мени ўйинда эканлигимни қайд этади. Зизу доим ёрдам беради.
— Зиданнинг ишончи ҳақида
«Зидан барча футболчиларга ишонади. Агар футболчи ўзига ишонмаётган бўлса ҳам буни Зидан ўзгартиради. Майдонга ҳар доим бир хил таркиб тушмайди».
— Ўйинлар таҳлили ҳақида
«Зидан ўйинлар видеотасвирини қўйиб бериб, футболчилар нимани яхши, нимани ёмон қилганини ва нималарни яхшилаш кераклигини тушунтиради. Бундай нарсалар устида ишлаётганимиз жуда яхши, албатта. Мен ҳам бу орқали ўзимдаги фарқларни кўраман. Ўсаётганлигимни, жамоага ёрдам бераётганлигимни, жамоа эса менга катта кўмак кўрсатаётганини тушунаман. Жорий мавсум бошқаларга қараганда жуда кам гол ўтказяпмиз. Натижалардан ҳам буни билса бўлади».
— Кийим алмаштириш хонасидаги қўллаб-қувватлов ҳақида
«Бразилияликлар — Марсело, Каземиро, Милитао, Родриго... Доим бир-биримизни қўллаб-қувватлаймиз. Бу эса бизга бизга хотиржамликни сақлаб қолишга ёрдам беради. Чунки айтганларидек, бу ерга бўлишдан кўра, бу хонада қолиш қийинроқ».
— «Хетафе»га қарши баҳсдан сўнг танқидлар ҳақида
«Югуриш учун майдон четига бордим. 8 марта югуришни такрорлашим керак эди. Мен эса буни эртага тонгда қилишимни мураббийга айтдим. Одамлар эса мени машғулот ўтказишдан бош тортганим ҳақида гапирди. Аммо мен уйда машғулот ўтказгандим. Шунингдек, ўйиндан сўнг албатта югуришни амалга ошириш шарт эмас».
— Неймарнинг Олимпиадада иштирок этишни хоҳлаётгани ва унинг Америка Кубогида кўпроқ кераклиги ҳақида
«Иккала тарафда ҳам, умуман, Неймарнинг ҳар бир ўйинда йўқлиги билинади. У иккала мусобақада ҳам ўйнаши ва жамоага ёрдам бериши мумкин».
— Неймар ва «Олтин тўп» ҳақида
«Неймар дунёнинг энг яхши ўйинчиси бўлишга муносиб. Агар жароҳатлар бўлмаса ва етарлича ўйин амалиётига эга бўлса, у кўплаб совринларни ютиши мумкин. У билан бирга тўп суриш ажойиб ахир».
— Қийин вазиятлардаги характери ҳақида
«Агар бахтли бўлсанг, вазият қандай бўлишидан қатъи назар дунёга кулиб боқасан ва яна ниманидир ўрганишни хоҳлайсан. Булар ва оилам ёнимдалиги ҳар доим менга ёрдам бермоқда».
— Улғаётгани ҳақида
«Мен «Реал»да тажрибали футболчилар, барча совринларни ютиб бўлган афсоналар билан бирга тўп тепяпман. Аммо улар ҳамон ғалаба иштиёқини сақлаб қолган ва кўпроқ ғолиб бўлишни истайди. Улар мен ва Родригога ёрдам беряпти. Родриго ва Милитаонинг Мадридга келганига кўп бўлгани йўқ. Бироқ улар ҳам анча олдин келганларга ўхшайди. Улар ҳам жамоанинг бир қисми бўлиб қолиш, кўпроқ ғалаба қозонишни хоҳламоқда».
— ОАВ ва Винисиус
«Қарашлар жуда тез ўзгаришини гувоҳи бўляпман. Ноябрда мавсумнинг энг ёмон ўйинчилардан бири эдим. Ҳозир (февраль) эса энг яхшиларидан бири».
— Машғулотлар ҳақида
«Ўз ишингни кўнгилдагидек бажаришга, машғулотларда бор кучингни сарф этишга бор диққат-эътиборни жалб қилиш лозим».
— Машғулотларнинг ўйинлардаги ёрдами ҳақида
«Ҳа, машғулотларнинг ёрдами бироз тегади. Аммо уларни ўйинлар билан тенглаштириб бўлмайди. Ўйин вақти гол ура олсанг, ўзингга бўлган ишонч жуда тез қайтади».
Родриго ҳақида
«Мадрид»да ҳамма учун жой бор. Бу мураббийлар учун ҳам, футболчилар учун ҳам бирдек қийин. Зидан шу боисдан ротацияга кўп қўл уради. Шундан олиб қаралса, ҳаммамизда ўйин вақти деярли тенг чиқади. Родриго билан бир-биримизга ёрдам беряпмиз. Бразилиядалигимздаёқ дўст эдик. У билан бу ерда ҳам терма жамоада ҳам бирга тўп тепишни истайман».
— Азарнинг жароҳатдан тузалиб қайтиши ва асосий таркибдаги жойини қайтариб олиши ҳақида
«Азарнинг қайтаётганидан хурсандман. Бу эса Зидан яна бир футболчидан фойдаланиши мумкинлигини англатади. Биз кейинги ўйинларда шундай юқори даражадаги футболчи бизга қанчалик керак бўлганини кўрамиз. У мавсум сўнгида бизга катта кўмак беради. Ҳал қилувчи паллада барча футболчилар ўз жисмоний ҳолатининг чўққисида бўлишини истаймиз».
— Ўнг қанотдаги ўйини ҳақида
«Бир хил ўйин кўрсата олмайман. Шунинг устида ишлашим керак. Боиси аввал ҳеч қачон ўнг қанотда ўйнашимга тўғри келмаган. «Реал»да эса бу ҳолатга бир неча бор тушдим. Чап қанотда нима қилиш кераклигини яхши биламан, ўнгда эса бу қийинроқ».
— «Бернабеу»даги мухлислар ҳақида
«Ўтган мавсум сўнгида тўп келиб тушгач, рақиб майдони томон ҳаракатланган вақтим мухлисларга бу ҳолат ёқиб, мени қўллаб-қувватлаганди. Улар бу ишни қилиб, мени ғоятда бахтли қилган эдилар. Мен ҳам кўплаб голлар уриб, «Мадрид» билан кўплаб совринларни ютган ҳолда жамоа ғалабаларига ўз ҳиссамни қўшишни истайман».
— Танқидлар ҳақида
«Бошланғич босқичда кўплаб голлар урасан. Аммо профессионал босқичда голларинг сезиларли даражада камаяди. Бу осон эмас, бироқ мен эндигина 19 ёшдаман. Тажрибали футболчиларнинг ёрдами сабаб янада кучлироқ бўлиб боряпман. Шу жиҳатдан мен Раҳим Стерлингга ўхшайман. У ҳам менинг ёшимда худди шундай ўйин кўрсатганди. Аммо ҳозир у кўплаб голлар урмоқда. Ҳатто ўтган мавсумдагидан ҳам. Вақти келса, голлар ҳам келади. Зидан машғулотларда мен билан ишламоқда, ҳужумни қандай якунлаш борасида ёрдам бермоқда. Мураббийинг собиқ футболчи бўлса, бу кўп нарсани англатади, майдонда ҳам, ундан ташқарида ҳам».
— Жамоага янги келган Рейньер ҳақида
«Энди ёнимизда бразилиялик яна бир футболчи бўлади».
— Унга маслаҳатлар
«Кучлироқ бўлиш учун аввалоси Рауль бошчилигидаги «Кастилья»даги ўйинларига диққатини қаратиши лозим. Унда мослашиш учун 4 ой бор».
— Бразилия терма жамоаси ҳақида
«Терма жамоа рўйхатида бўлишни хоҳлайман, орзу қиламан. Родриго, Милитао ва Каземиро ҳам».
Блиц савол-жавоблар:
— «Фламенго»«Жамоа кўплаб совринлари ютади деб умид қиламан».
— Мундиал ёки Чемпионлар Лигаси
«Иккаласи ҳам».
— Чемпионлар Лигасида пенальтини тепиш ёки Рамосга бериш
«Рамосга бераман».
— Каземирога қарши бирга-бир ўйнаш, ёки тўпни ҳимоя қилиш
«Каземирога қарши бирга-бир ўйнаш, фақат машғулотларда»
— Нима қийинроқ: Марселодек тўпга эгалик қилиш, ёки машғулотлардагидек бошқариш
«Тўпга эгалик қилиш»
— Марсело
«Кумирим».
— Каземиро
«Каземиф».
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)