O‘zbekistonda koronavirus qayd etilgan bemorlar soni va ular davolanayotgan hududlar bo‘yicha ma’lumot berildi

Sog‘liqni saqlash vazirligi koronavirus yuqtirib olgan 504 nafar o‘zbekistonliklar haqida qo‘shimcha ma’lumot berdi.

Xabarga ko‘ra, bemorlarning 212 nafari erkak, 292 nafari ayollar. Ularning 20 nafarini 0-9 yoshgacha bo‘lganlar (4 foiz), 29 nafarini 10-19 yoshgacha bo‘lganlar (5,8 foiz), 84 nafarini 20-29 yoshgacha bo‘lgan fuqarolar (16,7 foiz), 132 nafarini 30-39 yoshgacha bo‘lganlar (26,2 foiz), 137 nafarini 40-49 yoshgacha bo‘lganlar (27 foiz), 72 nafarini 50-59 yoshgacha bo‘lganlar (14,3 foiz), 22 nafarini 60-69 yoshgacha bo‘lganlar (4,4 foiz), 7 nafarini 70-79 yoshgacha bo‘lganlar (1,4 foiz) tashkil qiladi. 80 yoshdan yuqori bo‘lgan 1 nafar (0,2 foiz) fuqaro ham karantindagilar orasida bor.

Koronavirus infeksiyasiga chalingan 194 nafar bemor Toshkent shahrida davolanmoqda. Shuningdek, Qoraqalpog‘iston Respublikasida 16, Andijon viloyatida 61, Buxoro viloyatida 84, Namangan viloyatida 51, Farg‘ona viloyatida 70, Xorazm viloyatida 18, Qashqadaryo viloyatida 6, Navoiy viloyatida 2, Samarqand viloyatida 1, Jizzax viloyatida 1 nafardan bemor hududdagi yuqumli kasalliklarga ixtisoslashtirilgan shifoxonalarda davolanmoqda.

Shu o‘rinda aytish kerakki, laborator tahlillar natijasida kasalligi aniqlangan fuqarolar doimiy ro‘yxatdan o‘tgan joyidan qat’i nazar karantinda bo‘lgan hududidagi ixtisoslashgan tibbiyot muassasalariga davolash uchun o‘tkazilmoqda. Ayni paytda tibbiyot xodimlari tomonidan bemorlarga xalqaro standartlar asosida davo muolajalari olib borilmoqda.

Shu kunga qadar 30 nafar bemor ushbu kasallikdan butunlay sog‘aygan. Sog‘liqni saqlash vazirligi mutasaddi vazirlik va idoralar bilan hamkorlikda epidemiologik surishtiruv hamda koronavirus infeksiyasining tarqalib ketmasligi uchun barcha zarur profilaktik chora-tadbirlarni amalga oshirmoqda, deyiladi SSV jamoatchilik bilan aloqalar bo‘limining xabarida.