Koronavirus infeksiyasi tarqalishining oldini olish bo‘yicha joriy etilgan tartib munosabati bilan Toshkent shahar IIBB Markaziy apparati va uning hududiy bo‘linmalari binolarida fuqarolar va yuridik shaxslar vakillarining qabullari vaqtinchalik to‘xtatildi. Bu haqda IIBB tomonidan ma’lum qilindi.
Foto: “Daryo”
Xabar berilishicha, barcha murojaatlar elektron ko‘rinishda elektron pochta hamda Telegram boti orqali qabul qilinadi.
Fuqarolar va yuridik shaxslar o‘z murojaatlarini Toshkent shahar IIBBning “info@iibb.uz” elektron manziliga, Migratsiya va fuqarolikni rasmiylashtirish boshqarmasining Telegram’dagi @passport_viza botiga hamda Yo‘l harakati xavfsizligi boshqarmasining “yhxb.iibb.uz” saytidagi fuqarolar murojaati rukni orqali jo‘natishi mumkin.
Shuningdek, murojaatlar +99871 2819334, +99871 2819418 telefon raqamlari yoki O‘zbekiston Respublikasi Ichki ishlar vazirligining 1102 “ishonch raqami” orqali qabul qilinadi.
Ma’lum qilinishicha, Toshkent shahar IIBB huzuridagi Tergov boshqarmasi va uning tuman bo‘linmalari tergovchilariga jinoyat ishi bo‘yicha tergov jarayoni qatnashchilarini ichki ishlar organlariga faqatgina kechiktirib bo‘lmas tergov harakatlarini o‘tkazish uchun olib kelishi mumkin. Texnik imkoniyatlar mavjud bo‘lgan taqdirda barcha tergov harakatlari O‘zbekiston Jinoyat-protsessual kodeksi talablariga muvofiq videokonferensiya tarzida, ichki ishlar organlarining ma’muriy binolariga jarayon qatnashchilari bo‘lmagan shaxslarni kiritmagan holda olib boriladi.
Qayd etilishicha, ushbu vaqtinchalik cheklovlar Vazirlar Mahkamasining 2020-yil 23-martdagi “Koronavirus infeksiyasi tarqalishiga qarshi qo‘shimcha chora-tadbirlar to‘g‘risida”gi qarori va davlat sanitariya nazorati organlarining tegishli tavsiyalari ijrosiga muvofiq joriy etilgan.
Eslatib o‘tamiz, notariuslar, Davlat xizmatlari markazlari va FHDYo idoralari 25-martdan onlayn ish rejimiga o‘tdi. Oliy Majlis Senatining 24-martda bo‘lib o‘tgan 3-yalpi majlisi videokonferensaloqa shaklida o‘tkazildi.
