Toshkent shahrini viloyatlar bilan bog‘lovchi postlar yopildi. “Erkin” yo‘l-patrul xizmati maskani — suratlarda

Avval xabar qilinganidek, Respublika maxsus komissiyasi ko‘rsatmasiga ko‘ra, Transport vazirligi tomonidan 24-mart kuni soat 00:01 dan boshlab Toshkent shahriga respublikaning barcha hududlaridan kirish chiqishni har qanday transport vositalarida (avtobus, avtomobil, avia, temiryo‘l) amalga oshirish to‘xtatilgan.

Shuningdek, “Koronavirus infeksiyasi tarqalishiga qarshi qo‘shimcha chora-tadbirlar to‘g‘risida” hukumat qaroriga (176-son, 23.03.2020 y.) asosan O‘zbekiston hududida koronavirus infeksiyasi tarqalishiga qarshi kuchaytirilgan tartib joriy etilgan.

Unga ko‘ra boshqa hududlardan Toshkent shahriga kirish (avtobus, mikroavtobus, yengil avtotransport, aviaqatnovlar va temiryo‘l transport vositalari orqali) to‘xtatildi.

Toshkent shahrida doimiy ro‘yxatdan o‘tgan shaxslar, shuningdek, Toshkent viloyatida doimiy ro‘yxatdan o‘tgan holda Toshkent shahrida mehnat qilayotgan davlat tashkilotlari xodimlarining (nodavlat tashkilotlarida – ish beruvchining tegishli ruxsatnomasi asosida) shaharga kirish va chiqishiga ruxsat berildi.

Toshkent shahar hokimligi ushbu fuqarolarning korxona va tashkilotlariga kelishi va ketishi bo‘yicha barcha ishlar 2020-yil 24-martdan boshlab “Toshshahartransxizmat” AJ tomonidan shartnoma asosida amalga oshirilishini ma’lum qildi.

Taqdim etiladigan avtobuslarning har biri maxsus taniqlilik belgisi (emblema), yo‘lovchining tana haroratini o‘lchash uchun teplovizor bilan jihozlanadi. Shuningdek, har bir avtobus har kuni dezinfeksiya qilinishi ta’minlanadi. Har bir yo‘lovchining tana harorati avtobusga chiqishdan avval kamida 5 metr masofada o‘lchanadi va harorati yuqori bo‘lgan yo‘lovchi avtobusga chiqarilmaydi, deyilgan matbuot xizmati xabarida.

Eslatib o‘tamiz, Ichki ishlar vaziri o‘rinbosari Doniyor Qodirov karantin davrida viloyatlarda ilgari faoliyat yuritgan yo‘l harakati xavfsizligi maskanlarining faoliyati vaqtincha tiklanishini ham ma’lum qilgan. Postlarda Milliy gvardiya va Ichki ishlar vazirligi xodimlari hamkorlikda xizmat olib boradi.

“Daryo” muxbiri Toshkent shahrini viloyatlar bilan bog‘lovchi, bugun tunda yopilgan “Erkin” yo‘l-patrul xizmati maskanida bo‘lib, fotoreportaj tayyorladi.