Farg‘onada davlatga 77 mln so‘mdan ortiq zarar yetkazgan “Suvoqava” korxonasi rahbari uni to‘liq qoplab berdi

Majburiy ijro byurosi Yozyovon tumani bo‘limi xodimlari tomonidan tumandagi “Qatortol” MFY hududida joylashgan “Suvoqava” DUK Yozyovon tuman filialiga qarashli suv chiqarish inshooti ko‘zdan kechirilganida O‘zbekiston Respublikasi Vazirlar Mahkamasining 2018-yil 12-yanvardagi “Elektr energiyasi va tabiiy gazdan foydalanish tartibini takomillashtirishga doir qo‘shimcha chora-tadbirlar to‘g‘risida”gi 22-sonli qarori talablari qo‘pol ravishda buzilganligi aniqlangan. Bu haqda MIBning Farg‘ona viloyati boshqarmasi “Daryo”ga xabar berdi.

Aniqlanishicha, filial rahbari M.K. “Qatortol” MFYda joylashgan suv chiqarish inshootida o‘rnatilgan mavjud elektr hisoblagichni hech qanday ruxsatsiz “Elektr-hisob” dasturida yo‘q “SE 303” rusumli elektr hisoblagichga almashtirib olgan va elektr energiyasidan noqonuniy foydalanib kelinganligi sababli tuman elektr ta’minoti korxonasi manfaatlariga 77 million 770 ming 800 so‘m miqdorida moddiy zarar yetkazgan.

Byuro organlari tomonidan o‘tkazilgan tergovga qadar tekshiruv jarayonida M.K.ga O‘zbekiston Respublikasi Jinoyat kodeksining 185(2)-moddasi talablari mazmun-mohiyati, xususan, uning ijtimoiy xavfli harakati tufayli davlat manfaatlariga yetkazilgan 77,7 million so‘mlik zararni qonunda ko‘rsatilgan o‘ttiz kunlik muddat davomida to‘liq qoplagan taqdirda jinoiy javobgarlikdan ozod etilishi mumkinligi, aksincha holat yuzasidan jinoyat ishi qo‘zg‘atilib, jinoyat ishi tergovi jarayonida jinoyat oqibatida yetkazilgan zarar qonunda belgilangan tartibda undirilishi tushuntirilgan.

Suv ta’minoti korxonasi rahbari M.K. qonunda belgilangan o‘ttiz kunlik muddatda elektr energiyasidan noqonuniy foydalanish oqibatida davlatga yetkazilgan zararni to‘liq to‘lashni ma’qul ko‘rdi va moddiy zarar to‘liq undirilgan.

Qonunchilikka muvofiq, Jinoyat kodeksining 185(2)-moddasi 3-qismida shaxsning harakatlarida jinoyat alomatlari mavjud bo‘lsa-da, agarda u yetkazilgan moddiy zarar o‘rnini ixtiyoriy ravishda to‘liq qoplagan bo‘lsa, shaxs jinoiy javobgarlikdan ozod etilishi belgilangan.

Shunga ko‘ra, M.K.ga nisbatan to‘plangan hujjatlar yuzasidan O‘zbekiston Respublikasi Jinoyat Protsessual kodeksining 84-moddasi 1-qismi 8-bandiga asosan, uning ayblilik masalasini hal qilmasdan turib jinoyat ishi qo‘zg‘atishni rad qilish to‘g‘risida qaror qabul qilindi.