2020-yil boshlanganidan buyon Top-500 talikka kiruvchi dunyoning eng badavlat insonlari koronavirus tarqalishi hamda neft narxining tushib ketishi sabab qariyb 1 trillion dollar yo‘qotdi, deb xabar berdi Bloomberg.
Ma’lumotlarga ko‘ra, 12-mart kuni dunyoning eng badavlat 500 insoni yo‘qotgan mablag‘lar miqdori 331 milliard dollarni tashkil etgan, bu esa bu agentlikning eng boy odamlari reytingidagi sakkiz yillik tarixida kuzatilgan eng katta bir kunlik pasayish hisoblanadi.
Shunday qilib, yil boshidan buyon Top-500 ga kiruvchi biznesmenlar jami 950 milliard dollar (umumiy mablag‘larining 16 foizi) yo‘qotgan.
Yil boshida dunyoning eng badavlat insolarini umumiy boyligi 6,1 trillion dollarga baholangan edi. “Ushbu mablag‘lar koronavirus pandemiyasi sabab yuzaga kelgan qo‘rquv hamda neft narxining tushib ketishi oqibatida yo‘qotildi”, — deyiladi xabarda.
Bu kabi yo‘qotishlar birinchi navbatda Louis Vuitton Moët Hennessy kompaniyai rahbari Bernar Arnoga ta’sir qildi — u 9,5 milliard dollaridan ayrilgan. Shuningdek, Amazon asoschisi Jeff Bezos (8,1 milliard dollar), Microsoft asoschisi Bill Geyts (6,9 milliard dollar) yo‘qotgan.
Ta’kidlanishicha, Top-500 reytingiga kiruvchi rossiyalik tadbirkorlar bir kun ichida 15,4 milliard dollaridan ayrilgan.
Avvalroq Amerikaning asosiy indekslari Nyu-York fond birjalaridagi 12-mart kungi savdo natijalariga ko‘ra deyarli 10 foizga tushib ketgani haqida xabar berilgandi. Moody’s reyting agentligi virusning 2008—2010-yillardagi moliyaviy inqirozdan ko‘ra jiddiyroq oqibatlarga olib kelishi mumkinligi to‘g‘risida ogohlantirgan.
Izoh (0)