Toshkentning Uchtepa tumanidagi 14-mart kuni portlash yuz bergan avtoservisdagi vayronalar ostidan mahalliy vaqt bilan 20:00 lar atrofida uchinchi qurbonning jasadi topildi. Bu haqda Favqulodda vaziyatlar vazirligi matbuot xizmati xabar bermoqda.
Avvalroq hodisa oqibatida bir kishi hodisa joyida, yana bir kishi esa kasalxonada vafot etgani haqida xabar berilgan edi. Shuningdek, yana to‘rt kishi turli darajadagi tan jarohatlari bilan kasalxonaga yotqizilgani ma’lum qilingan edi.
Soat 11:00 atrofida yuz bergan gaz yoki kislorod ballonining yorilib ketishi oqibatida avtoservis binosi qisman vayron bo‘lgan edi. Hodisa joyida FVVning avariya-qutqaruv kuchlari va boshqa tuzilmalar vakillari ish olib bormoqda.
Hodisa sabablarini aniqlash bo‘yicha surishtiruv harakatlari olib borilmoqda. Dastlabki taxminga ko‘ra, hodisa kislorod yoki gaz ballonidan foydalanish vaqtida xavfsizlik texnikasini buzish oqibatida sodir bo‘lgan.
Izoh (0)