O‘zbekistonning 55 ta aeroporti, temiryo‘l va avtovokzallarida, shuningdek, boshqa jamoat joylarida 4 Mbit/sekund tezlikdagi Wi-Fi nuqtalari paydo bo‘ladi. Bu haqda Turizmni rivojlantirish davlat qo‘mitasiga tayanib, Spot xabar berdi.
Bundan tashqari mamlakat bo‘ylab 650 ta kompaniya internetga simsiz ulangan. 2019-yilda O‘zbekistonda jami 2 mingga yaqin bepul Wi-Fi nuqtalari paydo bo‘lgan. 2020-yilning oxiriga qadar ularning sonini 2614 taga yetkazish rejalashtirilgan.
Shuningdek, o‘tgan yili mehmonxonalarga kamida 4 Mbit/s tezlikdagi internet, shu jumladan, Wi-Fi orqali ulanishni ta’minlash talablari qo‘yilgan.
Toshkent temiryo‘l vokzallarida 2019-yil fevralida 100 Mb/s tezligida bepul Wi-Fi paydo bo‘lgandi. Loyihaga SOLA savdo belgisi ostida faoliyat olib boruvchi Asia Wireless Group korxonasi jalb etilgan.
Kassadan chipta sotib olayotgan chet elliklarga internetga kirish uchun maxsus vaucher taqdim etilgan. Bepul ulanish cheklangan vaqt davomida amal qilgan, keyinchalik simsiz tarmoqdan foydalanish pulli bo‘lgan.
Eslatib o‘tamiz, 2018-yilning oktabrida O‘zbekistonda bepul Wi-Fi hududlarini tashkil etish orqali sayyohlar noroziligiga barham berilishi ma’lum qilingandi. 2019-yilning mayida esa O‘zbekiston temiryo‘l vokzallaridagi bepul xizmatlar turlari aniqlashtirilgan edi.
Izoh (0)