Boks bo‘yicha beshta vaznda sobiq Jahon chempioni Floyd Meyvezer 600 million dollar evaziga irlandiyalik MMA jangchisi Konor Makgregor bilan revansh janggi o‘tkazishga tayyorligini ma’lum qildi.
Bundan tashqari Floyd rossiyalik MMA jangchisi, UFC chempioni Habib Nurmagomedov bilan bellashishga tayyorligini ta’kidladi, deb yozadi Mirror.
“Ijtimoiy tarmoqlarda muhokama qilganimizdek hozir ikkita nom bor: Makgregor va Nurmagomedov. Bu men uchun 600 million dollarni anglatadi. Agar tavakkal qilishga qaror qilgudek bo‘lsam, albatta, buning o‘ziga yarasha to‘lovi bo‘ladi. Oxirgi marta biz narxni 250 dan 300 millionga ko‘targandik. Joriy yilda ushbu chegarani ham zabt eta olamiz deb umid qilaman”, — deydi Floyd.
Ma’lumot uchun, 2018-yilda UFC chempioni Habib Nurmagomedov Floyd Meyvezerga jang o‘tkazish taklifi bilan chiqqandan so‘ng amerikalik bokschi telekanallarga ushbu bahsning namoyish etish huquqini qo‘lga kiritish uchun mablag‘ tayyorlab qo‘yishga chaqirgandi.
Eslatib o‘tamiz, Meyvezer 2017-yilda boks qoidalari bo‘yicha o‘tkazilgan jangda Konor Makgregorni mag‘lub etib, WBC’ning maxsus kamarini qo‘lga kiritgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)