Prezident Shavkat Mirziyoyev bugun, 28-fevral kuni, Toshkentning Mirzo Ulug‘bek tumani “Avayxon” mahallasida bunyod etilayotgan ko‘p qavatli uy-joylarni ko‘zdan kechirdi. Bu haqda Prezident matbuot xizmati xabar berdi.
Bu yerda jami 1120 ta xonadondan iborat 17 ta ko‘p qavatli uylar qurilishi loyihalashtirilgan. Bugungi kunda 5 ta turar joy qad rostlab, ichki pardozlash ishlari olib borilmoqda.
O‘zbekiston Prezidenti xonadonlardan birini kirib ko‘rgan, uylarning qurilish texnologiyasi va energiya tejamkorligiga e’tibor qaratgan.
Tashqi devorlar bazalt materiali bilan qoplangani ob-havo ta’sirini kamaytirib, xonadonlarning qishda issiq, yozda salqin bo‘lishini ta’minlaydi. Yana bir samarali tomoni bu — to‘liq mahalliylashtirilgan mahsulot.
Prezident mahalliy materiallarni ko‘proq ishlatib, uylarning narxini arzon qilish, ularni turli soha vakillari bilan birga kam ta’minlanganlarga ham ajratish bo‘yicha ko‘rsatmalar berdi. Kredit muddatini uzaytirish, ijaraga berish orqali kambag‘al oilalarni qo‘llab-quvvatlash muhimligini ta’kidladi.
“Shaharlarda odamlar kommunal xizmatlar sifatsizligidan norozi. Binolarni ekspluatatsiya qiladigan barqaror tashkilotlar, malakali kadrlar yetishmaydi. Yangi obyektlar eski tarmoqlarga ulab qo‘yiladi. Butun kvartal birdaniga uzoqdagi stansiyadan isitiladi. Aslida aql bilan qilinsa, kommunal to‘lovlarni 50 foizgacha arzonlashtirish mumkin”, — deydi Shavkat Mirziyoyev.
Yangi mavzeda avtonom issiqlik stansiyasi qurish, imoratlarni ekspluatatsiya qiladigan va sifatli xizmat ko‘rsatadigan zamonaviy shirkat tashkil etish bo‘yicha ko‘rsatma berildi.
Hududda yana bir nechta 9, 16 va bitta 25 qavatli turar joy barpo etilishi rejalashtirilgan. Loyihada zamonaviy qurilish normalari bilan birga milliy qadriyatlar, turli marosimlar uchun qulayliklar ham inobatga olingan. Barcha uylarni 2020-yil sentabrda foydalanishga topshirish mo‘ljallangan.
Shuningdek, maktab, bolalar bog‘chasi, dam olish va sport maydonchalari, bolalar o‘yingohlari, ko‘p qavatli avtoturargoh barpo etilishi loyihalashtirilgan.
Izoh (0)