“Mening fikrim” portaliga O‘zbekistonda uchuvchisiz uchadigan qurilmalardan foydalanishga qo‘yilgan taqiqni qayta ko‘rib chiqishni taklif qiluvchi petitsiya joylandi.
Murojaatda aytilishicha, boshqa mamlakatlarda dronlardan foydalanish bo‘yicha bunday qat’iy taqiqlar mavjud emas. Mazkur qurilmalar nafaqat turizmda, balki boshqa sohalarda ham keng imkoniyatlar ochadi.
Petitsiya to‘rt kun ichida 2500 dan ortiq ovoz to‘plagan. Agar murojaat belgilangan muddat ichida 10 mingta ovoz to‘plasa, parlament uni ko‘rib chiqishi kerak bo‘ladi.
O‘zbekistonda 2015-yildan buyon uchuvchisiz uchadigan qurilmalarni olib kirish, sotish va foydalanish taqiqlangan. Bu taqiqdan bir nechta holat mustasno. Xususan, “Geoinnovatsion markaz” DUK, xorijiy ijodiy guruhlar. Shu bilan birga, vazni 250 grammdan ortiq bo‘lmagan hamda foto va videokamera bilan jihozlanmagan uchuvchisiz uchadigan qurilmalarni mamlakatga olib kirish va ulardan foydalanish mumkin.
Agar dronlar qonuniy tartibda mamlakatga olib kirilsa, ulardan foydalanish uchun maxsus ruxsatnoma olish kerak bo‘ladi.
Prezident Shavkat Mirziyoyev 2019-yilning 2-may kuni dronlardan noqonuniy foydalanganlarni ozodlikdan mahrum etishni ko‘zda tutuvchi qonunni imzolagani haqida xabar berilgan edi.
Qonunga ko‘ra, Jinoyat kodeksiga uchuvchisiz uchadigan apparatlarni qonunga xilof ravishda olib kirish, o‘tkazish, olish, saqlash yoki ulardan foydalanish uchun uch yilgacha ozodlikdan mahrum qilish jazosi kiritilgan.
Mazkur harakatlar takroran yoki o‘ta xavfli retsidivist tomonidan, o‘z xizmat vakolatidan foydalangan holda yoki bir guruh kishilar tomonidan oldindan kelishilgan holda sodir etilganda, o‘rta yoki og‘ir darajadagi tan jarohati yetkazishga sabab bo‘lganda — uch yildan besh yilgacha ozodlikdan mahrum qilishga sabab bo‘ladi.
Mazkur harakatlar odam o‘limiga, halokatga yoki boshqa og‘ir oqibatlarga sabab bo‘lsa, sakkiz yildan o‘n yilgacha ozodlikdan mahrum qilish jazosi qo‘llaniladi.
Yangi qoidalarning kuchga kirishi munosabati bilan Davlat bojxona qo‘mitasi fuqarolarni belgilangan talablarga to‘liq rioya qilishga chaqirdi.
Qo‘mita tomonidan xabar berilishicha, uchuvchisiz uchish qurilmalarini, ularning qo‘shimcha va ehtiyot qismlarini o‘z ixtiyori bilan topshirgan shaxslar jinoiy javobgarlikdan ozod qilinadi.
Izoh (0)