Buyuk Britaniyaning Times Higher Education (THE) nashri iqtisodiyoti tez rivojlanayotgan davlatlarning universitetlari reytingini e’lon qildi.
Reytingning dastlabki to‘rt pog‘onasidan Xitoy universitetlari o‘rin olgan (Sinxua, Pekin, Chjetzyan va Xitoy Fan va texnologiya universiteti). 5-o‘rin Lomonosov nomidagi Moskva davlat universitetiga nasib etgan. Keyingi o‘rinlar tegishli ravishda quyidagi tartibda joylashgan: Jao Tong Shanxay universiteti (Xitoy), Fudan universiteti (Xitoy), Tayvan milliy universiteti (Tayvan), Nanjing universiteti (Xitoy) hamda Keyptaun universiteti (JAR).
Eng yaxshi universitetlar yuztaligidan Rossiyaning yana bir qator universitetlari o‘rin olgan. Xususan, Moskva fizika-texnika universiteti (12-o‘rin), Oliq iqtisod maktabi (18-o‘rin), Tomsk milliy tadqiqot universiteti (52-o‘rin), Sankt-Peterburg politexnika universiteti (72-o‘rin).
Ta’kidlash kerakki, ushbu reytingga O‘zbekistonda joylashgan yuzdan ortiq universitetlarning birortasi kira olmagan.
Eslatib o‘tamiz, 2019-yilning oktabrida Prezident Shavkat Mirziyoyev 2030-yilgacha oliy ta’lim tizimini rivojlantirish konsepsiyasini tasdiqlovchi qarorga imzo chekkan edi. Unga ko‘ra, O‘zbekiston Milliy universiteti va Samarqand davlat universitetinini ilg‘or universitetlarga aylantirish va ulardagi ta’lim darajasini dunyoning 500 ta eng yaxshi universitetlari qatoriga qo‘shish rejalashtirilgan.
Izoh (0)