Jizzaxda 52 va 67 yoshli ikki erkak o‘rtasida rashk sababli janjal yuz berdi va kelishmovchilik pichoqbozlik bilan tugadi. Bu haqda O‘zbekiston Ichki ishlar vazirligi huzuridagi Tergov departamenti xabar berdi.

Foto: Tergov departamenti

Ma’lumi qilinishicha, 9-fevral, yakshanba kuni, taxminan soat 20:45 da muqaddam sudlangan 52 yoshli Q.A., o‘ziga oldindan tanish bo‘lgan 39 yoshli ayol D.J.ning xonadoniga borgan. Erkak D.J.ning bugungi kundagi turmush o‘rtog‘i, 67 yoshli F.X. bilan rashk sababli tortishib qolgan.

Tortishuv oqibatida Q.A. o‘zi bilan olib kelgan pichoq bilan F.X.ning qorin sohasiga bir marta urib, tan jarohati yetkazgan va shu pichoq bilan o‘ziga ham shikast yetkazgan.

Natijada F.X. va Q.A. olgan tan jarohatlari bilan shifoxonaga murojaat qilgan. Mazkur holat yuzasidan Zarbdor tumani IIB huzuridagi tergov guruhi tomonidan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.

Avvalroq jizzaxlik erkak boshqa erkaklar bilan munosabatda gumon qilib, o‘zining homilador rafiqasini yoqib yuborgan edi. Toshkentda erkak xotinini pichoqlamoqchi bo‘lganida uni to‘xtatgan IIB xodimini jarohatlagani haqida xabar berilgan edi. 31-yanvar kuni Samarqandda qaynuka kelinoyisini pichoqlab o‘ldirgan. G‘allaorolda esa erini pichoqlagan ayolga nisbatan 3 yil ozodlikni cheklash jazosi tayinlangan edi. Yangi yil kechasi esa Toshkentda ichki ishlar organi xodimi homilador rafiqasini do‘pposlagan.