Sog‘liqni saqlash vazirligi tomonidan tibbiy ma’lumotga ega bo‘lmagan shaxsga ishlash uchun ruxsat berish tartibi ishlab chiqildi. Bu haqda Sog‘liqni saqlash vazirligi boshqarma boshlig‘i Farhod Rahimqulov Tabobat akademiyasining 2019-yildagi konferensiyasida aytib o‘tdi, deya xabar bermoqda “Daryo” muxbiri.
O‘zbekiston Sog‘liqni saqlash vazirligi va Tabobat akademiyasi hamkorligida tabiblar faoliyatini yanada takomillashtirishga qaratilgan konferensiya o‘tkazildi.
Konferensiyada ma’ruza qilgan Sog‘liqni saqlash vazirligi litsenziyalash va akkreditatsiyalash boshqarmasi boshlig‘i Farhod Rahimqulovning ma’lum qilishicha, Prezident Shavkat Mirziyoyevning xalq tabobatini tartibga solish bo‘yicha alohida qarorida tabiblik faoliyatini tartibga solish bo‘yicha ko‘rsatmalar berilgan.
Qarorda birinchi navbatda xalq tabobati vakillarining ishlashini tartibga solish uchun normativ hujjatlarni ishlab chiqish ko‘rsatilgan. Chunki shu kungacha xalq tabobati bilan shug‘ullanadigan shaxslar, ya’ni tabiblarning faoliyatini tartibga soladigan birorta normativ hujjat yo‘q edi. Shuningdek, qarorda xalq tabobati bilan shug‘ullanuvchilar faoliyatini tartibga solishga doir bir nechta normativ hujjatlar ishlab chiqish ham nazarda tutilgan. Ya’ni tabib ish olib boradigan xonadan tortib, ularning malakasigacha bo‘lgan jarayon ham tartibga solinadi. Shu bilan birga, ular foydalanadigan asbob-uskunalarni ishlatishga ruxsat berish tartibi ishlab chiqiladi.Prezident qarorida tibbiy ma’lumotga ega bo‘lmagan tabiblarga ishlashga ruxsat beruvchi — litsenziyalash tartibini ishlab chiqish nazarda tutilgan. Bugungi kunda kimlardir xalq tabobati bilan faoliyat yuritadimi, degan savol tug‘ilsa, ha, yuritadi. Bizda davlat tibbiyot tashkilotlarida xalq tabobati usullari qo‘llaniladi. Shuningdek, 500 dan ortiq xususiy tibbiyot muassasalari ham shu faoliyat bilan shug‘ullanadi. Lekin tibbiy ma’lumotga ega bo‘lmagan shaxslar bilan bog‘liq masala asosiy muammo hisoblanar edi.
Sog‘liqni saqlash vazirligi tomonidan tibbiy ma’lumotga ega bo‘lmagan shaxsga ishlash uchun ruxsat berish tartibi ishlab chiqildi. Bu hujjatni ishlab chiqish oson bo‘lmadi. Sababi “Qanday qilib tibbiy ma’lumotga ega bo‘lmagan shaxsga sog‘lig‘imizni ishonib topshiramiz, axir buni bugungi rivojlangan zamonda hazm qilish qiyin” kabi tanqidiy savollar ham o‘rtaga tashlandi. Qarshi bo‘lganlar ham, qo‘llab-quvvatlaganlar ham bo‘ldi. Takliflarni tegishli vazirlik va idoralar bilan kelishilgan holda bir to‘xtamga kelinib, normativ hujjat ishlab chiqildi. Vazirlar Mahkamasi qarori darajasida ishlab chiqilgan nizomda tabobat bilan shug‘ullanuvchi shaxslarga qay tartibda ruxsat berish shartlari nazarda tutilgan. Hozirda ushbu hujjat Adliya vazirligiga kiritilish arafasida turibdi.
Aytib o‘tish joizki, oddiy infeksiya bilan ishlash talabini bajara olmagan tabib yuqumli kasallikning tarqalishiga sabab bo‘ladi. Tabibning oldiga xizmati arzonligi uchun odam ko‘p kelishi mumkin yoki xalqimiz tabibga ishonuvchan. Tabiblarga ishlash uchun qonuniy ruxsat beradigan bo‘lsak, tabiblar birinchi navbatda yuqumli, og‘ir yoki xuruj qilib turgan kasalliklarni vaqti kelganda zamonaviy tibbiyot orqali davolashni tavsiya etishlari kerak. Shuning uchun ham tabiblarga qo‘yiladigan talablar bor. Nazarimda, qisqa vaqt ichida tibbiy ma’lumotga ega bo‘lmagan shaxslarga litsenziya berish tartibi yo‘lga qo‘yiladi.
Shuni unutmaslik kerakki, tabib bilan zamonaviy tibbiyot xodimlarining javobgarlik darajasi teng. Ya’ni tibbiyot xodimi qanday tartibda javobgar bo‘lsa, tabiblar ham shunday mas’ul bo‘ladi.
Sog‘liqni saqlash vazirligida maxsus komissiya tashkil qilinadi. Komissiya tabiblarni ma’lum bosqichlarda o‘rganib, tekshirib ko‘radi. Shundan so‘ng ularga tibbiyotdan qay darajada ma’lumotga ega ekanligi haqida xulosa beriladi. Shundan keyin tabiblar umumiy tartibda —xususiy tibbiyot muassasalari kabi faoliyat uchun litsenziya olishga murojaat qiladi.
Farhod Rahimqulov, Sog‘liqni saqlash vazirligi litsenziyalash va akkreditatsiya boshqarmasi boshlig‘i
O‘zbekiston Tabobat akademiyasi raisi, professor Ibrohimjon Asqarovning aytishicha, akademiya qoshida tabiblarni qayta tayyorlash o‘quv kurslarini tashkil etish rejalashtirilgan.
“Sog‘liqni saqlash vazirligi, Toshkent vrachlar malakasini oshirish instituti bilan hamkorlikda alohida dasturlar ishlab chiqdik. Tabiblar orasidan haqiqiylarini saralab olgan holda ularni qayta o‘qitib, bugungi kun talablariga moslashtiramiz. Ana undan keyin Sog‘liqni saqlash vazirligida tuzilgan maxsus komissiya orqali litsenziya berish masalalarini rejalashtirganmiz.Konferensiya ishida olimlar va tabiblar mavjud muammolarni bartaraf etish masalalarini hal qilishga doir takliflar bilan chiqdi. Jumladan, ishtirokchilar tomonidan tabiblar malakasini jahon talablariga mos ravishda oshirib borish o‘rtaga tashlandi. Bunga javoban Tabobat akademiyasi raisi Ibrohimjon Asqarov bir guruh tabiblarning Birlashgan Arab Amirliklariga malaka oshirish uchun yuborilishini ma’lum qildi.Tabiblar o‘z faoliyatida foydalanishi uchun “Tabobat qomusi” nomli fundamental kitobni yaratdik. Kitobda qayd etilgan O‘zbekistonda o‘sadigan o‘simliklar yordamida yangi dorilar yaratish bo‘yicha ishlar amalga oshirilyapti. Bu dori vositalari ekologik toza, organizm uchun zararsiz va bu dori vositalaridan foydalanish iqtisodiy samarador hamda sifatli ekanligi bilan ajralib turadi. Biz tabiblarimizni mana shu yo‘nalishda qayta tayyorlashga bel bog‘laganmiz”.
Ibrohimjon Asqarov, O‘zbekiston tibbiy-ilmiy faoliyat bilan shug‘ullanuvchilar tabobat akademiyasi raisi, professor
Ma’lumot uchun, hozirgi kunda akademiyaning 300 nafar a’zosi bor. Ularning 40 foizini vrachlar — fan doktorlari, professorlar va tajribali tabiblar tashkil etadi.
Mavzuga doir:
Izoh (0)