Bugun,

  • USD 11095.31
  • RUB 173.84
  • EUR 10772.44

Jahon sog‘liqni saqlash tashkiloti (JSST) tomonidan Xitoyda yangi koronavirus tarqalishi bilan bog‘liq vaziyatni aholi sog‘lig‘ini saqlash sohasidagi xalqaro darajadagi favqulodda vaziyat deb e’lon qilindi. Bundan bir muddat oldin Vazirlar Mahkamasida Epidemiyaga qarshi kurash favqulodda komissiyasining yig‘ilishi o‘tkazilgan bo‘lsa, shu yil 29-yanvarida davlat rahbarining “O‘zbekiston Respublikasiga koronavirusning yangi turi kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha respublika maxsus komissiyasining tashkil etish to‘g‘risida”gi farmoyishi qabul qilindi.

Foto: Sog‘liqni saqlash vazirligi

Foto: Sog‘liqni saqlash vazirligi

Sog‘liqni saqlash vazirligi matbuot xizmatiga ko‘ra, bugun ayni masalada JSSTning mamlakatdagi vakolatxonasi bilan hamkorlikda videoselektor yig‘ilishi o‘tkazildi. Uni sog‘liqni saqlash vaziri Alisher Shodmonov olib borgan.

Unda qayd etilganidek, Sog‘liqni saqlash vazirligi Xitoydagi epidemik vaziyatdan kelib chiqqan holda O‘zbekiston hududiga koronavirus infeksiyasining kirib kelishi va tarqalishining oldini olish borasida Jahon sog‘liqni saqlash tashkiloti bilan uzluksiz ishlamoqda, hamkorlikda barcha zarur chora-tadbirlar amalga oshirilmoqda.

Xususan, havo, avtomobil va temir yo‘l transporti obyektlarida sanitariya-epidemiologiya va migratsiya nazorati kuchaytirilmoqda. Bu borada qo‘llanma va tavsiyalar ishlab chiqilib, barcha tegishli vazirlik va idoralarga ijro uchun yuborildi. Tunu kun faoliyat ko‘rsatuvchi maxsus shtab faoliyati yo‘lga qo‘yildi. Kasallikda gumon qilingan fuqarolar ixtisoslashtirilgan davolash muassasalarida chuqurlashtirilgan tibbiy tekshiruvdan o‘tkazilyapti.

Mamlakatda davlat chegaralarining kesishish joylarida 52 ta sanitariya-karantin punkti faoliyat ko‘rsatmoqda. Chegara postlaridan o‘tayotgan fuqarolar tibbiy nazorat ko‘rigidan o‘tkazilmoqda, shuningdek, teplovizor yordamida yo‘lovchilarning tana harorati masofadan turib o‘lchanmoqda va umumiy holati tekshirilmoqda.

Foto: Sog‘liqni saqlash vazirligi

Foto: Sog‘liqni saqlash vazirligi

Ammo ushbu chora-tadbirlar xavfsizlikni to‘liq kafolatlaydi degani emas, deya qayd etildi videoselektorda. Negaki, koronavirus infeksiyasi havo tomchilari orqali o‘tishi, insondan insonga yuqishi, shuningdek, kasallikning klinik belgilari 14 kungacha yashirin kechishi xotirjam bo‘lishga sabab bo‘lmasligiga e’tibor qaratildi. Qolaversa, bugungacha 20 ga yaqin tibbiyoti rivojlangan mamlakatda bu kasallik kuzatilayotganligi vaziyatning naqadar jiddiyligini ko‘rsatib turibdi.

Shu bois bo‘lib o‘tgan videoselektorda ayni paytga qadar O‘zbekistonda bunday kasallikka chalinish holati umuman kuzatilmaganligiga qaramasdan ehtiyot choralarini yanada kuchaytirish borasida mutasaddilarga aniq topshiriqlar berildi.

Jumladan, xorijdan, ayniqsa, Xitoydan kelayotgan fuqarolarni tibbiy ko‘rikdan o‘tkazish, ularning ro‘yxatini shakllantirish, kasallikning yashirin davri davomida tibbiy nazoratga olish, zaxira o‘rinlarini tayyorlash, dori-darmon, dezinfeksiya vositalari va zarur tibbiy anjomlar bilan ta’minlash ustidan nazoratni yanada kuchaytirish, kasallikka qarshi kurashishda tegishli vazirlik va idoralar bilan hamkorlikdagi faoliyatni kuchaytirish kabi qator vazifalar ko‘rsatib o‘tildi.

Izoh
Asosiy yangiliklar
Dunyo
Genotsidda gumonlanayotgan erkak, sohilga chiqib qolgan o‘lik akula, Rossiya kuniga tayyorgarlik — 9-iyun suratlari 
Qozog‘iston
Qozog‘istonda yirik o‘rmon yong‘ini: 3 kishi halok bo‘ldi, To‘qayev yong‘in zonasiga boradi (video)
Dunyo
Medvedev AQSHning boshqa mamlakatlardagi harbiy amaliyotlarini sanab o‘tdi va Oq uyni “jim bo‘lishga” chaqirdi