Samarqandda YPX xodimiga pora berayotgan fuqarolar qo‘lga olindi, deb xabar berdi Samarqand viloyati IIB YHXB axborot xizmati.
24-yanvar, juma kuni soat 03:40 da Samarqand viloyati IIB yo‘l harakati xavfsizligi boshqarmasi bo‘linmalari yo‘l-patrul xizmati batalyoni, to‘rtinchi otryadi xodimlari tomonidan Kattaqo‘rg‘on tumani Samarqand ko‘chasining ichki yo‘lida xizmat olib borayotganda “KamAZ-5320” rusumli, 30 V 397 DA davlat raqam belgili (transport vositasi Urgut tumani “Pochvon” MFYda yashovchi, 1981-yilda tug‘ilgan fuqaro A.F.ga tegishli) yuk tashuvchi transport vositasi to‘xtatiladi.
YPX xodimlarining haydovchidan tegishli hujjatlarini taqdim qilishi so‘ralganda haydovchi o‘zini Urgut tumani “Pochvon” MFYda yashovchi, 2000-yilda tug‘ilgan J.R. deb tanishtiradi. Lekin avtomashina hujjatlari, ya’ni transport vositasini qayd etish guvohnomasi, haydovchilik guvohnomasi, ishonchnomasi va majburiy sug‘urta polisi yashash uyida qolib ketganligini ma’lum qilgach, YPX inspektorlari tomonidan unga nisbatan UZ№19-30-290616-raqamli ma’muriy bayonnoma rasmiylashtirilib, avtomashina jarima maydonchasiga joylashtirilgan.
O‘sha kuni soat 16:00 lar atrofida Kattaqo‘rg‘on tumani “Mullakichkina” MFYda joylashgan viloyat IIB yo‘l harakati xavfsizligi boshqarmasi yo‘l-patrul xizmati batalyoni, to‘rtinchi yo‘l-patrul xizmati otryadi ma’muriy binosiga, yo‘l-patrul xizmati ma’muriy amaliyot katta inspektori vazifasini bajarayotgan katta serjant A.Normurodovning oldiga haydovchi J.R. keladi. U jarima maydonchasida saqlanayotgan “KamAZ-5320” rusumli yuk avtomashinasini chiqarib berishini so‘rab, 600 000 so‘m miqdoridagi pullari borligini, keyin yana 400 000 so‘m berishini bildirib, pora taklif qiladi.
Katta serjant A.Normurodov unga bu harakati noqonuniyligi, pora olish-berish jinoyat ekanligini tushuntirishiga qaramasdan, J.R. 25-yanvar, shanba kuni kelishini aytib chiqib ketadi. Katta serjant A.Normurodov haydovchi J.R. bilan bo‘lgan o‘zaro suhbatini IPhone rusumli telefon apparatiga yozib olib, DVD diskka ko‘chiradi va viloyat IIB boshlig‘ining nomiga tezkor tadbir o‘tkazishni so‘rab murojaat qiladi.
Tekshiruv davomida fuqaro J.R.ga “KamAZ-5320” rusumli yuk tashuvchi transport vositasini boshqarish uchun ishonchnomasi mavjud emasligi, unga 2018-yil 19-iyul kuni “B,C” toifadagi transport vositalarini boshqarish huquqi bilan AAC2420746 raqamli haydovchilik guvohnomasi berilganligi aniqlandi.
25-yanvar, shanba kuni katta serjant A.Normurodovning bildirgisiga asosan IIV O‘z xavfsizligi boshqarmasi va IIV O‘XB viloyat bo‘yicha bo‘limi xodimlari hamkorligida o‘tkazilgan tezkor tadbir davomida haydovchi J.R., avtomashina egasi A.F., amakisining o‘g‘li, 1992-yilda tug‘ilgan Urgut tumani “Pochvon” mahallasida yashovchi X.Sh. ushbu avtomashinani jarima maydonchasidan chiqartirib berishga yordam berishini so‘rab, soat 13:30 larda katta serjant A.Normurodovning xizmat xonasida X.Sh. tomonidan 1 000 000 so‘m pullarni pora sifatida bergan vaqtida ashyoviy dalillar bilan ushlandi.
Mazkur holat yuzasidan Departamentning Kattaqo‘rg‘on tumani bo‘yicha bo‘limi xodimlari tomonidan hodisa sodir bo‘lgan joy ko‘zdan kechirilib, holat yuzasidan tergovga qadar tekshirish harakatlari olib borilmoqda.
Izoh (0)