Adliya vazirligida ish vaqti yakunlangandan so‘ng xodimlarning kompyuterlari tarmoqdan uzib qo‘yilmoqda

Adliya vazirligi mehnat unumdorligini oshirish maqsadida kompleks chora-tadbirlar dasturini ishlab chiqdi. Bu haqda “Huquqiy axborot” Telegram kanali ma’lum qildi.

Ushbu dasturning bitta tadbiri sifatida xodimlarni kun mobaynida o‘z faoliyatini to‘g‘ri rejalashtirish yuzasidan tushuntirishlar berilib, taym menejmentning yangi zamonaviy modellaridan foydalanish ilgari surilmoqda.

Xodimlar ish vaqti tugagandan keyin o‘z faoliyatini tugatish talab etilmoqda. Eng keskin chora sifatida esa ish kuni oxirida barcha xodimlarning xizmat kompyuterlari avtomatik ravishda tarmoqdan uzib qo‘yilish tartibi ham kiritildi. Mazkur holatda xodim o‘z-o‘zidan ishini tugatishiga to‘g‘ri keladi.

Bundan tashqari, yakshanba kuni xodimlarning ishga chiqishi taqiqlangan. Bu talabning bajarilishi qat’iy nazorat qilinmoqda. Ya’ni, xodim ko‘rsatmaga amal qilmasdan ishga kelsa ham u binoga kiritilmaydi.

Hozirda vazirlikda kadrlar bilan ishlashning zamonaviy KPI tizimi asosida ish tashkil etilib, har bir xodimning mehnat samaradorligi individual ravishda baholab borilmoqda. Bu ham o‘z navbatida ish jarayoniga ijobiy ta’sir ko‘rsatmoqda.

“Mazkur choralar natijasida xodimlar ish vaqtidan unumli foydalanishga hamda mehnat jarayonini optimal rejalashtirishga majbur bo‘lmoqda va bu o‘z mevasini bermoqda. O‘z vaqtida oilasi bag‘riga qaytgan, yetarlicha dam olib, pozitiv energiyaga ega bo‘lgan xodimlarning mehnat samaradorligi ortib bormoqda. Maqsad samarali, zamonaviy va bexato ishlash tizimiga o‘tishdan iborat”, — deyiladi vazirlik xabarida.