O‘zbekiston ichki ishlar vaziri AQSh elchisi bilan uchrashdi

O‘zbekiston Ichki ishlar vazirligida 17-yanvar kuni vazir Po‘lat Bobojonovning AQSh elchisi Daniel Rozenblyum bilan uchrashuvi bo‘lib o‘tdi, deya xabar bermoqda vazirlik matbuot xizmati.

Uchrashuv chog‘ida taraflar o‘zaro hamkorlikka doir masalalarni muhokama etib, O‘zbekiston ekspertlarining AQShga tanishuv tashrifini tashkil etish borasida kelishib olgan.

“Bu kabi tashriflardan ko‘zlangan maqsad AQShning huquq-tartibotni saqlash, uyushgan jinoyatchilikka qarshi kurash, odam savdosi bilan bog‘liq jinoyatlarni ochish borasidagi ish uslubini o‘rganishdan iborat bo‘lib, ekspert-kriminalistik bo‘linmalari uchun kadrlarni tayyorlash, sohani zamonaviy jixozlar bilan ta’minlashga ko‘maklashish kabi masalalarni hal etishdir”, — deyiladi vazirlik axborotida.

Uchrashuv yakunlariga ko‘ra, elchi Rozenblyum Amerika diplomatik missiyasi nomidan O‘zbekiston IIV bilan hamkorlikni rivojlantirishga o‘z hissasini qo‘shishini ta’kidlab o‘tgan.