O‘zbekistonda taqiqlangan tashkilotlarga adashib kirib qolgan 11 nafar fuqaro javobgarlikdan ozod etiladigan bo‘ldi

Bosh prokuraturada 15-yanvar, chorshanba kuni bosh prokuror raisligida Terroristik, ekstremistik yoki boshqa taqiqlangan tashkilot va guruhlar tarkibiga adashib kirib qolgan O‘zbekiston fuqarolarining murojaatlarini ko‘rib chiqish bo‘yicha Respublika idoralararo komissiyasining navbatdagi yig‘ilishi bo‘lib o‘tdi. Bu haqda Bosh prokuratura matbuot xizmati ma’lum qildi.

Yig‘ilishda Prezidentning “Terroristik, ekstremistik yoki boshqa taqiqlangan tashkilot va guruhlar tarkibiga adashib kirib qolgan O‘zbekiston Respublikasi fuqarolarini jinoiy javobgarlikdan ozod etish tartibini takomillashtirish to‘g‘risida”gi farmoni ijrosi yuzasidan taqiqlangan tashkilotlar tarkibiga adashib kirib qolgan 12 nafar fuqaroning jinoiy javobgarlikdan ozod etish haqida taqdim etilgan murojaatlari ko‘rib chiqildi.

Yig‘ilishda komissiya va ishchi guruh a’zolari — Oliy sud raisi o‘rinbosari, Ichki ishlar vazirining birinchi o‘rinbosari, Respublika mahallalar kengashi raisi o‘rinbosari, Yoshlar ittifoqi markaziy kengashi raisining birinchi o‘rinbosari, Xotin-qizlar qo‘mitasi raisi o‘rinbosari, Tashqi ishlar vazirining maslahatchisi, Din ishlari bo‘yicha qo‘mita raisining o‘rinbosari, Musulmonlar idorasi, DXX, IIV va Bosh prokuraturaning tegishli boshqarma va tarmoq boshliqlari hamda mas’ul xodimlari qatnashdi.

Yig‘ilishda komissiya a’zolari tomonidan taqiqlangan tashkilotlar tarkibiga adashib kirib qolgan 11 nafar fuqaroni jinoiy javobgarlikdan ozod etish haqida xulosalar qabul qilindi. Bir nafar fuqaroning murojaatini qo‘shimcha o‘rganish uchun ishchi organga qaytarish haqida ovoz berildi.

Ma’lumot uchun, komissiyaga joriy yil 1-yanvar kuniga qadar jami 70 ta murojaat kelib tushgan bo‘lib, ularning 18 tasi farmon talablariga mos kelmagan, 20 tasi komissiyada muhokama qilingan (10 tasi javobgarlikdan ozod etish va 4 tasini rad etish haqida xulosa qilingan, 6 tasi qo‘shimcha o‘rganishga qaytarilgan), 32 tasi qoldiqda qolgan.

Jinoiy javobgarlikdan ozod qilingan 11 nafar fuqaroni O‘zbekistonga qaytarish, ijtimoiy-huquqiy yordam ko‘rsatish, shu jumladan, ularning bandligini ta’minlashga ko‘maklashishga qaratilgan tashkiliy chora-tadbirlarni amalga oshirish haqida topshiriqlar berildi.