“‘Yuz-ko‘zingni o‘yib olaman’ deydigan ayollar bor ekan”. Deputat Kalonov — saylovoldi uchrashuvlari va deputatlar majburiyati haqida

Deputatlar saylov arafasida bergan va’dalarini bajarishi kerak, “saylandim, ish bitdi” degan tushuncha bilan qolib ketmaslik kerak. Bu haqda xalq deputatlari Toshkent shahar kengashi deputati, kengashning Reglament va deputatlik odobi masalalari bo‘yicha doimiy komissiyasi raisi Rustam Kalonov aytib o‘tdi, deya xabar bermoqda “Daryo” muxbiri Musulmonbek Ibrohimov.

Deputat Kalonovning ta’kidlashicha, 2019-yilgi parlament saylovlari kurashlarga boy bo‘lgani va o‘ziga xos murakkab kechgani bilan avvalgi jarayonlardan farq qilgan.

Ko‘p saylovlarda qatnashganman, lekin bu galgi saylovlar oson bo‘lgani yo‘q. Oliy Majlis Qonunchilik palatasi deputatligiga bo‘lgan jarayonlarni qo‘ya turing, xalq deputatlari Toshkent shahar kengashiga deputatligi uchun kurash ham murakkab kechdi.

Prezidentimiz shunday donolik bilan xalq bilan uyma-uy yurib muloqot qilish komissiyalarini tuzgan ekanlar, saylovchilar bilan uchrashuvlarda juda asqotdi. Saylovchilar bilan uchrashuvlarda ko‘p qatnashdim. Shunaqangi qo‘chqor ayollarimiz bor ekanki, “yuz-ko‘zingni o‘yib olaman” deydi.

Deputatlikka saylanganlarning bari saylovchilar bilan uchrashuvlarda va’dalar bergan. Endi shu va’dalarni bajarmoq kerak. Xalqda “ovoz oldi, shu bilan tamom, bo‘ldi”, degan tasavvur paydo bo‘lmasin.

Rustam Kalonov, xalq deputatlari Toshkent shahar kengashi deputati