Tovar va moliya bozorlarida kompaniyalarning birlashuvi va qo‘shib olinishi, shunindek, ulushlar oldi-sotdisi bo‘yicha oldindan rozilik berish orqali bozor konsentratsiyasi ustidan nazoratni amalga oshirish O‘zbekiston Monopoliyaga qarshi kurash qo‘mitasining vazifalaridan biri hisoblanadi.
Qo‘mita 2019-yil davomida ma’qullangan bir necha yirik kelishuvlar haqida ma’lumot berdi, deya xabar bermoqda Spot.
TBC Bank Group / Inspired (Payme)
Payme O‘zbekistondagi mijozlari soni 1,3 milliondan ortiq bo‘lgan yetakchi to‘lov xizmatlaridan biri hisoblanadi. Gruziyaning TBC banki Inspired‘dan ulush sotib olib, o‘z texnologiyalari bilan O‘zbekiston bozoriga kirib keldi.Ushbu kelishuv TBC Bank Group va uning shu’ba kompaniyalari xizmat ko‘rsatayotgan foydalanuvchilarning umumiy sonini 3,7 million kishigacha oshirish imkonini beradi.
Hozirda TBC Bank Group O‘zbekistonda raqamli xizmatlarni faol tatbiq etmoqda — Payme’ning xizmat turlari kengaytirilmoqda, chiptalar sotuvi bo‘yicha onlayn-servis ishga tushirildi, Vendoo savdo platformasini ishga tushirish arafasida, shunindek, raqamli bank tashkil etish ustida ish olib bormoqda.
Nestle Uzbekistan / B.S.A. (Fransiya) va B.S.A. International (Belgiya)
Lactalis — 1933-yili Fransiyada asos solingan xalqaro sut konserni bo‘lib, bosh qarorgohi Fransiyaning Laval shahrida joylashgan. Kompaniya jahonning 148 mamlakatiga kirib borgan va sut mahsulotlari ishlab chiqarish bo‘yicha jahonda uchinchi o‘rinda turadi. Butun dunyo bo‘ylab 211 ta zavodga egalik qiladi.Kompaniya 2019-yilda Nestle’ning O‘zbekistondagi suv va sut mahsulotlarini ishlab chiqarish bo‘yicha bizneslarini, jumladan, Namanganda joylashgan ikkita fabrikani sotib oldi.
Sinotruck / JV MAN Auto-Uzbekistan
JV MAN Auto-Uzbekistan ta’sischilari soni Xitoyning Sinotruck kompaniyasi hisobiga yana bittaga ko‘paydi. Sinotruck 2009-yili MAN bilan strategik sheriklikni yo‘lga qo‘ygan bo‘lib, ushbu hamkorlik natijasi o‘laroq nemis kompaniyasi Sinotruck’ning 25 foiz + 1 dona aksiyasi egasi hisoblanadi.Hozirda JV MAN Auto-Uzbekistan’da MAN’ning CLA, TGM, TGS seriyalaridagi 60 dan ortiq yuk texnikalari yig‘ilmoqda. Spot’ning qayd etishicha, hozirda kelishuvni ro‘yxatga olish bo‘yicha jarayon yakuniga yetmoqda.
O‘zbekiston—Ummon investitsiya kompaniyasi / SD Mall (“Samarqand darvoza” SKM) va Magic Fruit (“Compass” SKM)
O‘zbekiston—Ummon investitsiya kompaniyasi 2017 va 2018-yillarda O‘zbekistondagi bir qator korxonalarga faol investitsiya kiritgan edi.Kompaniya 2019-yilda ikkita yirik savdo-ko‘ngilochar markaz (SKM)larni sotib olish bo‘yicha kelishuvni amalga oshirdi. O‘zbekistonning eng yirik savdo-ko‘ngilochar markazlaridan hisoblangan “Samarqand darvoza” va “Compass” The Tower Mall Management Group kompaniyalar guruhi tarkibiga kiradi.
Hightex Singapore PTE / UZTEX Group
2015-yilda tashkil etilgan hamda to‘qimchilik va charm-teri mahsulotlarining ulgurji savdosi bilan shug‘ullanuvchi Hightex Singapore PTE xususiy kompaniyasi UZTEX Group‘dan ulush sotib oldi.Bugungi kunda UZTEX O‘zbekiston to‘qimachilik sanoatidagi yetakchi ishlab chiqaruvchilardan biri, MDHdagi eng yirik tekstil eksportyori hisoblanadi. Kompaniya tarkibida O‘zbekistonning turli hududlarida joylashgan sakkizta yirik fabrika mavjud.
Izoh (0)