Товар ва молия бозорларида компанияларнинг бирлашуви ва қўшиб олиниши, шуниндек, улушлар олди-сотдиси бўйича олдиндан розилик бериш орқали бозор концентрацияси устидан назоратни амалга ошириш Ўзбекистон Монополияга қарши кураш қўмитасининг вазифаларидан бири ҳисобланади.
Қўмита 2019 йил давомида маъқулланган бир неча йирик келишувлар ҳақида маълумот берди, дея хабар бермоқда Spot.
TBC Bank Group / Inspired (Payme)
Payme Ўзбекистондаги мижозлари сони 1,3 миллиондан ортиқ бўлган етакчи тўлов хизматларидан бири ҳисобланади. Грузиянинг TBC банки Inspired‘дан улуш сотиб олиб, ўз технологиялари билан Ўзбекистон бозорига кириб келди.Ушбу келишув TBC Bank Group ва унинг шуъба компаниялари хизмат кўрсатаётган фойдаланувчиларнинг умумий сонини 3,7 миллион кишигача ошириш имконини беради.
Ҳозирда TBC Bank Group Ўзбекистонда рақамли хизматларни фаол татбиқ этмоқда — Payme’нинг хизмат турлари кенгайтирилмоқда, чипталар сотуви бўйича онлайн-сервис ишга туширилди, Вендоо савдо платформасини ишга тушириш арафасида, шуниндек, рақамли банк ташкил этиш устида иш олиб бормоқда.
Nestle Uzbekistan / B.S.A. (Франция) ва B.S.A. International (Бельгия)
Lactalis — 1933 йили Францияда асос солинган халқаро сут концерни бўлиб, бош қароргоҳи Франциянинг Лавал шаҳрида жойлашган. Компания жаҳоннинг 148 мамлакатига кириб борган ва сут маҳсулотлари ишлаб чиқариш бўйича жаҳонда учинчи ўринда туради. Бутун дунё бўйлаб 211 та заводга эгалик қилади.Компания 2019 йилда Nestle’нинг Ўзбекистондаги сув ва сут маҳсулотларини ишлаб чиқариш бўйича бизнесларини, жумладан, Наманганда жойлашган иккита фабрикани сотиб олди.
Sinotruck / JV MAN Auto-Uzbekistan
JV MAN Auto-Uzbekistan таъсисчилари сони Хитойнинг Sinotruck компанияси ҳисобига яна биттага кўпайди. Sinotruck 2009 йили MAN билан стратегик шерикликни йўлга қўйган бўлиб, ушбу ҳамкорлик натижаси ўлароқ немис компанияси Sinotruck’нинг 25 фоиз + 1 дона акцияси эгаси ҳисобланади.Ҳозирда JV MAN Auto-Uzbekistan’да MAN’нинг CLA, TGM, TGS серияларидаги 60 дан ортиқ юк техникалари йиғилмоқда. Spot’нинг қайд этишича, ҳозирда келишувни рўйхатга олиш бўйича жараён якунига етмоқда.
Ўзбекистон—Уммон инвестиция компанияси / SD Mall («Samarqand darvoza» СКМ) ва Magic Fruit («Compass» СКМ)
Ўзбекистон—Уммон инвестиция компанияси 2017 ва 2018 йилларда Ўзбекистондаги бир қатор корхоналарга фаол инвестиция киритган эди.Компания 2019 йилда иккита йирик савдо-кўнгилочар марказ (СКМ)ларни сотиб олиш бўйича келишувни амалга оширди. Ўзбекистоннинг энг йирик савдо-кўнгилочар марказларидан ҳисобланган «Samarqand darvoza» ва «Compass» The Tower Mall Management Group компаниялар гуруҳи таркибига киради.
Hightex Singapore PTE / UZTEX Group
2015 йилда ташкил этилган ҳамда тўқимчилик ва чарм-тери маҳсулотларининг улгуржи савдоси билан шуғулланувчи Hightex Singapore PTE хусусий компанияси UZTEX Group‘дан улуш сотиб олди.Бугунги кунда UZTEX Ўзбекистон тўқимачилик саноатидаги етакчи ишлаб чиқарувчилардан бири, МДҲдаги энг йирик текстиль экспортёри ҳисобланади. Компания таркибида Ўзбекистоннинг турли ҳудудларида жойлашган саккизта йирик фабрика мавжуд.
Изоҳ (0)