“Xalq banki” Yakkabog‘ tumani filiali xodimlarining ish haqini to‘lamagani uchun Damas’idan ayrildi

AT “Xalq banki”ning Yakkabog‘ tuman filiali xodimlarining ish haqini to‘lamagani uchun Damas avtomobilidan ayrildi. Bu haqda “Daryo”ga MIB Qashqadaryo viloyat boshqarmasi axborot xizmati ma’lum qilmoqda.

Ma’lum bo‘lishicha, 2019-yilning dekabr oyida Fuqarolik ishlari bo‘yicha Yakkabog‘ tumanlararo sudining ijro varaqasiga asosan AT “Xalq banki” Yakkabog‘ tuman filialining 3 nafar xodimi ishga qayta tiklangan. Ammo bank ushbu xodimlarining majburiy bekor yurgan vaqti uchun to‘lashi kerak bo‘lgan ish haqini shu kunga qadar to‘lamagan. Ya’ni G.P.ning 1 million 523 ming 833 so‘m, A.A.ning 1 million 454 ming 327 so‘m va A.X.ning 2 million 632 ming so‘m ish haqini to‘lamayotganligi uchun bankning Damas rusumli avtomobili jarima maydonchasiga olib ketilgan.

— Kelgusida bank berilgan muddat ichida ish haqlarini to‘lamagan taqdirda ushbu avtomobilni sotib qarzdorlikni to‘lash choralari ko‘riladi, — deyiladi MIB viloyat boshqarmasi tarqatgan ma’lumotda.