Samarqand viloyati Davlat xavfsizlik xizmati va viloyat IIB tezkor xizmat xodimlari tomonidan olib borilgan tezkor tadbir davomida Oqdaryo tumanidagi “Mahalla” qishlog‘idagi 14 sotix yer maydonining 3,5 sotixida “Xo‘rozlar jangi” musobaqasi uchun Arena faoliyatiga chek qo‘yildi. Bu haqda “Daryo” muxbiri xabar bergan.
1986-yilda tug‘ilgan G.J. turmush o‘rtog‘i S.B. bilan birgalikda noqonuniy ravishda xo‘roz urishtirishga mo‘ljallangan arena tashkil qilib, shu yerda o‘tadigan janglarni ko‘rish va ularda ishtirok etish uchun kelganlarda 5 ming so‘mdan 8 ming so‘mgacha miqdorda pul olib kelgan.
Tezkor tadbirda xo‘rozlarini urishtirish uchun olib kelgan jami 31 nafar fuqaroning harakatlari o‘rnatilgan tartibda rasmiylashtirilgan.
UFC yoki MMA oktagonlarini eslatib yuboradigan arenaga 250 nafar tomoshabin tashrif buyurgan. Tomoshabinlarga tegishli 60 ta transport vositasining hujjatlari ko‘zdan kechirilgan.
S.B.ning hovlisida noqonuniy yo‘l bilan tashkil qilingan arena tekshiruvi vaqtida, uning noqonuniy ravishda tabiiy gazdan foydalanib kelgani ham aniqlandi, xonadon egasiga nisbatan Ma’muriy javobgarlik to‘g‘risidagi Kodeksning 101-moddasi tartibida tegishli tartibda hujjatlashtirildi.
Samarqand viloyati DSI tomonidan S.B.ning noqonuniy chakana savdo bilan shug‘ullangani ham aniqlanib, Ma’muriy javobgarlik to‘g‘risidagi kodeksning 175-moddasi 1-qismi bo‘yicha ish qo‘zg‘atilib 720 500 so‘mlik tovar boyliklari tegishli tartibda rasmiylashtirildi.
Oqdaryo tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 278-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.
Izoh (0)