Самарқанд вилояти Давлат хавфсизлик хизмати ва вилоят ИИБ тезкор хизмат ходимлари томонидан олиб борилган тезкор тадбир давомида Оқдарё туманидаги «Маҳалла» қишлоғидаги 14 сотих ер майдонининг 3,5 сотихида «Хўрозлар жанги» мусобақаси учун Арена фаолиятига чек қўйилди. Бу ҳақда «Дарё» мухбири хабар берган.
1986 йилда туғилган Г.Ж. турмуш ўртоғи С.Б. билан биргаликда ноқонуний равишда хўроз уриштиришга мўлжалланган арена ташкил қилиб, шу ерда ўтадиган жангларни кўриш ва уларда иштирок этиш учун келганларда 5 минг сўмдан 8 минг сўмгача миқдорда пул олиб келган.
Тезкор тадбирда хўрозларини уриштириш учун олиб келган жами 31 нафар фуқаронинг ҳаракатлари ўрнатилган тартибда расмийлаштирилган.
UFC ёки MMA октагонларини эслатиб юборадиган аренага 250 нафар томошабин ташриф буюрган. Томошабинларга тегишли 60 та транспорт воситасининг ҳужжатлари кўздан кечирилган.
С.Б.нинг ҳовлисида ноқонуний йўл билан ташкил қилинган арена текшируви вақтида, унинг ноқонуний равишда табиий газдан фойдаланиб келгани ҳам аниқланди, хонадон эгасига нисбатан Маъмурий жавобгарлик тўғрисидаги Кодекснинг 101-моддаси тартибида тегишли тартибда ҳужжатлаштирилди.
Самарқанд вилояти ДСИ томонидан С.Б.нинг ноқонуний чакана савдо билан шуғуллангани ҳам аниқланиб, Маъмурий жавобгарлик тўғрисидаги кодекснинг 175-моддаси 1-қисми бўйича иш қўзғатилиб 720 500 сўмлик товар бойликлари тегишли тартибда расмийлаштирилди.
Оқдарё тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 278-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
Изоҳ (0)