Behzod Hoshimov qachondir O‘zbekistonga qaytadi va hozir AQShda pulni deb yurgani yo‘q. Bu haqda u Lazizbek Hamidovning “Ular” dasturiga bergan intervyusida aytib o‘tdi.
Amerikadagi oylik daromadim — universitet oylik to‘laydi. Universitet sug‘urtamni ham to‘laydi va boshqa xarajatlarimni ham qoplaydi. Agar Amerikaning ixtiyoriy normal shtatida doktorant bo‘lsangiz, albatta oylik maosh olasiz. Shu oylik hisobidan qaysidir domlaga tadqiqot assistenti bo‘lib ishlaysiz, yoki ba’zi holatlarda dars berasiz.Behzod Hoshimovning qo‘shimcha qilishicha, unga AQShdagi har kurs darsi uchun 6 ming dollardan pul to‘lanadi.Masalan, kuzgi semestrda men tadqiqotchi edim, bahordan boshlab dars bera boshlayman. Ya’ni, o‘sha joyning ishchisi hisoblanaman. Universitet beradigan pul mening oylik xarajatlarimni qoplaydi. Juda ko‘p pul qolmaydi-yu, lekin qoplaydi. To‘lanadigan pul Amerika uchun kam. Amerikada sotib olgan uyim yo‘q, ijaraga olaman, qimmat-ku.
Lekin shu yaxshi fikr. Men sal yoshlik qilib qo‘yganman, boshqa universitetda o‘qigan bir tanishim esa doktoranturaga kirganida ipoteka oldi. O‘qishni yetti yilda bitirdi. O‘qishni bitira turib, ipotekaga olgan uyining ko‘p qismini to‘lab qo‘ygan. Ipoteka olsangiz, uy sizniki bo‘ladi — sotsangiz, farqi chiqarib tashlanadi.
Men, masalan, ijaraga har oy pul to‘layapman, lekin bu pul saqlanib qolmaydi. Balki, to‘g‘ri aytayotgandirsiz, birinchi kurs vaqtimda olganimdami edi, balki hozir Amerikadagi uyimning 20 foizini to‘lab qo‘ygan bo‘lardim. Balki shu to‘g‘riroq qarordir. Lekin men o‘shanda magistraturadan so‘ng o‘sha yerda doktoranturaga ham qolishimni bilmagandim, umuman bunga qiziqmagandim.
Qachondir O‘zbekistonga to‘liq qaytib kelish istagi ham bor. Hozir AQShdagi holatim meni qoniqtiradi, lekin pulni deb emas. AQShning o‘zida magistraturani bitirgan ko‘p kursdoshlarim normal pul olishadi — yiliga 150—180 ming dollar maosh olishadi. Doktoranturada o‘qishning ma’nosi — sohaga qiziqishingizdan. Pulni deb doktorant bo‘lmang, degan bo‘lardim.
Chunki doktoranturaga kiradigan darajada bo‘lsangiz, yaxshiroq ish ham topa olasiz, ishda esa maosh yaxshiroq bo‘ladi va hokazo. Balki professor bo‘lsangiz, maoshingiz yaxshiroq bo‘lsa kerak.
Behzod Hoshimov, iqtisodiyotchi
https://twitter.com/bkhoshim/status/1213119881006071808
Izoh (0)