O‘zbekiston ilk marta Rossiya poytaxti bilan muntazam avtobus qatnovlarini yo‘lga qo‘ydi. “Toshkent” avtovokzalidan Moskvaga yo‘l olgan avtobus 25-dekabr kuni “Novoyasenevskaya” avtostansiyasiga yetib bordi. Bu haqda “MIR 24” telekanali xabar qildi.
O‘zbekiston poytaxtidan Rossiya poytaxti sari yo‘lga chiqqan avtobus 3,5 ming kilometrli masofani 64 soatda bosib o‘tgan. Uch haydovchi har 4 soatda almashib, avtobusni boshqarib kelgan.
“Uzautotrans service” korxonasi avtobusi 50 kishiga mo‘ljallangan bo‘lsa-da, ilk reys faqat 3 kishiga xizmat ko‘rsatdi.
Haydovchi Arman Marzabekovning so‘zlariga ko‘ra, 2019-yilda ishlab chiqarilgan avtobus konditsioner, muzlatgich, issiq va sovuq suvli kuler bilan jihozlangan.
Avvalroq ushbu yo‘nalish bo‘ylab muntazam avtobus qatnovlari haftasiga ikki marotaba — dushanba va payshanba kunlariga belgilangani, chipta narxi 900 000 so‘m etib belgilangani xabar qilingandi.
Ma’lumot uchun, bugungi kunda Rossiyaning Nijniy Novgorod va Qozon shaharlariga ham muntazam avtobus qatnovlari amalga oshirib kelinmoqda.
Eslatib o‘tamiz, “Milliy tiklanish” partiyasi rahbari Alisher Qodirov xorijdagi mehnat muhojirlarining huquqlarini himoya qilish bo‘yicha savolga javob qaytara turib, “o‘zini hurmat qilgan odam 50 dollar tejash uchun 50 daraja sovuqda xorijga ketmaydi” degan edi.
Izoh (0)