Kogon shahridagi 9-umumta’lim maktabining hojatxonasida sinf tashkil etilganligi haqida ijtimoiy tarmoqlarda e’lon qilingan xabar mutaxassislar tomonidan o‘rganildi. Bu haqda Buxoro viloyati xalq ta’limi boshqarmasi axborot xizmati ma’lum qildi.
Axborot xizmatiga ko‘ra, maktab 1986-yilda qurilgan 1176 o‘rinli zamonaviy binoda joylashgan bo‘lib, 2019/2020-o‘quv yilida 1573 nafar o‘quvchiga ta’lim-tarbiya berib kelinmoqda.
Maktab binosi 3 qavatdan iborat bo‘lib, har bir qavatida ichki hojatxona, yuvinish xonalari loyihalashtirilgan. Biroq, 3-qavatdagi hojatxona va yuvinish xonasidan yillar davomida foydalanilmagan.
Hojatxona uchun ajratilgan joy sinfxona sifatida foydalanish uchun emas, balki ayrim hollarda o‘quvchilar bilan alohida sinfdan tashqari mashg‘ulotlarda foydalanish uchun rekonstruksiya qilingan.
Ikkinchi rasmda ko‘rsatilgan xona 2x1 o‘lchamli kichkina yuvinish xonasi bo‘lib, unga umuman o‘quvchilar kiritilmagan.
“Yuqorida tasvirlangan xonadan foydalanish to‘xtatildi va sinfdan tashqari mashg‘ulotlarni o‘tkazish uchun ikkinchi smenada bo‘shaydigan sinf xonalaridan foydalanish tashkil etildi”, — deyiladi xabarda.
Izoh (0)