Mahkumlar ishlaydigan 40 ta davlat unitar korxonasida 2019-yilning 11 oyi davomida 66 turdagi 219 milliard so‘mlik mahsulotlar ishlab chiqarildi. Bu haqda 9-dekabr, dushanba kuni ozodlikdan mahrum etilgan shaxslarni mehnat bilan bandligini ta’minlash bo‘yicha amalga oshirilgan ishlar yuzasidan tashkil etilgan matbuot anjumanida ma’lum qilindi, deya xabar bermoqda “Daryo” muxbiri.
IIV Jazoni ijro etish bosh boshqarmasi tomonidan taqdim etilgan ma’lumotlarga ko‘ra, ozodlikdan mahrum etilgan shaxslarning mehnat bilan bandligini ta’minlash maqsadida 40 ta davlat unitar korxonasi tashkil etilgan. Korxonalarning 23 tasi ishlab chiqarishga, 17 tasi esa qishloq xo‘jaligiga ixtisoslashgan.
Joriy yilning 11 oyi davomida ushbu korxonalar tomonidan 219 millirad so‘mlik 66 turdagi mahsulot ishlab chiqarilib, 15,2 milliard so‘m daromad olindi. Yil yakuniga qadar davlat unitar korxonalarida 250 milliard so‘mlik mahsulotlar ishlab chiqarilib, 20 milliard so‘mdan ortiq daromad olish rejalashtirilgan.
Mahkumlarni kasb-hunarga o‘rgatish maqsadida xalq hunarmandchiligi va amaliy san’at yo‘nalishi bo‘yicha 18 nafar mutaxassis tomonidan 1285 nafar mahkumga kasb-hunar o‘rgatish ishlari olib borilmoqda. Hunarmandchilik kurslarini tamomlagan 272 nafar mahkumga sertifikat berilgan.
Izoh (0)