Namangan otchoparida qishloq xo‘jaligi xodimlari kuni munosabati bilan ko‘pkari tashkil qilindi. Bu haqda “Daryo” muxbiri Azizbek Abduvaliyev xabar bermoqda.
O‘n minglab tomoshabin kuzatgan musobaqalarda mingdan ortiq chavandoz o‘zining uloqchi oti bilan maydonga tushdi. Tashkilotchilar tomonidan 3 ta tuya, 12 ta toy, o‘ndan ortiq buzoq, o‘ttizga yaqin qo‘y-echki, o‘nlab gilam, televizor va boshqa qimmatbaho sovg‘alar sovringa tikildi.
Uloqda mamlakatdagi barcha viloyatlar, shuningdek qo‘shni Qirg‘istonning O‘sh, Jalolobod va boshqa hududlaridan kelgan chavandozlar ishtirok etdi.
Ot chopishda faxriylar ham yoshlarga namuna bo‘ldi. Uloqning bosh hakamligi vazifasini 70 yoshga borib qolgan to‘raqo‘rg‘onlik Murod polvon Mirzayev bajargan bo‘lsa, andijonlik 70 yashar Sulaymon polvon o‘zining “Gerkules” laqabli otida o‘rtadan uloq olib chiqib, mahoratini namoyish qildi.
Otchopar atrofida o‘tovlar tikilib, qishloq xo‘jaligi xodimlari uchun dasturxon yozildi. Uning qarshisidagi sahnada esa Rustam G‘oyipov, Shohjahon Jo‘rayev qo‘shiqlari bilan tadbirni qizdirdi.
Bayram tadbiri Namangan shahridagi “Shodiyona” majmuasida davom etdi. Bu yerda bir guruh soha vakillari va ularga kamarbasta bo‘lganlar viloyat hokimligining esdalik sovg‘alari bilan taqdirlandi.
Viloyatda birinchi bo‘lib paxta yig‘im-terimini bajargan Mingbuloq tumani hokimligiga klaster korxonasi tomonidan Chevrolet Tracker avtomobili taqdim etildi.
Ma’lumot uchun, O‘zbekistonda dekabr oyining ikkinchi yakshanbasi qishloq xo‘jaligi xodimlari kuni etib belgilangan.
Izoh (0)