O‘zbekiston Respublikasi Markaziy saylov komissiyasining navbatdagi majlisi bo‘lib o‘tdi, deb yozmoqda O‘zA.
Videokonferensaloqa shaklida o‘tkazilgan tadbirda ayrim saylov uchastkalariga biometrik identifikatsiya qilish qurilmalarini o‘rnatish, saylovlarda xorijiy davlatlar va xalqaro tashkilotlardan qatnashadigan kuzatuvchilarni, ommaviy axborot vositalari vakillarini akkreditatsiyadan o‘tkazishga oid masalalar ko‘rib chiqildi.
O‘zbekiston Respublikasi Markaziy saylov komissiyasining raisi M. Abdusalomov MSK tomonidan demokratik huquqiy davlatda saylovlarni ochiq oshkora tashkil etish, mamlakat fuqarolarining saylovga oid Konstitutsion huquqlarini to‘liq amalga oshirish, har bir saylovchiga hoh u mamlakatimiz hududida, hoh u xorijiy davlatda istiqomat qilayotgan bo‘lsin, saylovlarda faol ishtirok etish va o‘zi munosib deb topgan nomzodga ixtiyoriy, yashirin ovoz berish huquqini ta’minlash borasida izchil ishlar amalga oshirilayotganini alohida ta’kidladi.
MSK qaroriga binoan, xorijiy davlatlarda istiqomat qilayotgan vatandoshlarimiz bo‘lgan saylovchilarning siyosiy huquqlarini ta’minlash maqsadida, O‘zbekiston Respublikasining xorijiy davlatlardagi vakolatxonalari va konsullik muassasalari huzurida 55 ta saylov uchastkalari tashkil etilgan va ular Toshkent shahrida tuzilgan O‘zbekiston Respublikasi Oliy Majlisi Qonunchilik palatasi deputatlari saylovini o‘tkazuvchi 12 ta saylov okruglariga biriktirilgan.
O‘zbekiston Respublikasi Prezidentining 2018-yil 4-oktabrdagi “Saylov jarayoniga zamonaviy axborot-kommunikatsiya texnologiyalarini joriy etish chora-tadbirlari to‘g‘risida”gi qarorida belgilangan vazifalarning ta’minlash maqsadida O‘zbekiston Respublikasi Axborot texnologiyalari va kommunikatsiyalarining rivojlantirish vazirligi hamda Qoraqalpog‘iston Respublikasi Jo‘qorg‘i Kengesi va Toshkent shahar hokimligi taklifiga ko‘ra o‘zgartirish kiritilgan ayrim saylov uchastkalariga biometrik identifikatsiya qilish qurilmalarini o‘rnatish ishlarini 15-dekabrgacha yakunlash belgilandi hamda saylov kuni ovoz berish jarayoni va saylov yakunlarini chiqarish bosqichlari to‘g‘ridan to‘g‘ri namoyish etiladigan saylov uchastkalari ro‘yxati tasdiqlandi.
Majlisda O‘zbekiston Respublikasi Tashqi ishlar vazirligining taqdimnomasiga muvofiq Mustaqil davlatlar hamdo‘stligi kuzatuvchilar missiyasining 25 nafar xalqaro kuzatuvchisi akkreditatsiyadan o‘tkazildi.
Markaziy saylov komissiyasi tomonidan saylov kampaniyasini yoritish yuzasidan mamlakatimiz va chet el jurnalistlarini akkreditatsiyadan o‘tkazish davom etayotgani hozirgi kungacha 264 ta mahalliy va 100 dan ortiq xorijiy ommaviy axborot vositalari akkreditatsiyadan o‘tkazilganligi ma’lum qilindi.
Izoh (0)