Наманган отчопарида қишлоқ хўжалиги ходимлари куни муносабати билан кўпкари ташкил қилинди. Бу ҳақда «Дарё» мухбири Азизбек Абдувалиев хабар бермоқда.
Ўн минглаб томошабин кузатган мусобақаларда мингдан ортиқ чавандоз ўзининг улоқчи оти билан майдонга тушди. Ташкилотчилар томонидан 3 та туя, 12 та той, ўндан ортиқ бузоқ, ўттизга яқин қўй-эчки, ўнлаб гилам, телевизор ва бошқа қимматбаҳо совғалар совринга тикилди.
Улоқда мамлакатдаги барча вилоятлар, шунингдек қўшни Қирғистоннинг Ўш, Жалолобод ва бошқа ҳудудларидан келган чавандозлар иштирок этди.
От чопишда фахрийлар ҳам ёшларга намуна бўлди. Улоқнинг бош ҳакамлиги вазифасини 70 ёшга бориб қолган тўрақўрғонлик Мурод полвон Мирзаев бажарган бўлса, андижонлик 70 яшар Сулаймон полвон ўзининг «Геркулес» лақабли отида ўртадан улоқ олиб чиқиб, маҳоратини намойиш қилди.
Отчопар атрофида ўтовлар тикилиб, қишлоқ хўжалиги ходимлари учун дастурхон ёзилди. Унинг қаршисидаги саҳнада эса Рустам Ғойипов, Шоҳжаҳон Жўраев қўшиқлари билан тадбирни қиздирди.
Байрам тадбири Наманган шаҳридаги «Шодиёна» мажмуасида давом этди. Бу ерда бир гуруҳ соҳа вакиллари ва уларга камарбаста бўлганлар вилоят ҳокимлигининг эсдалик совғалари билан тақдирланди.
Вилоятда биринчи бўлиб пахта йиғим-теримини бажарган Мингбулоқ тумани ҳокимлигига кластер корхонаси томонидан Chevrolet Tracker автомобили тақдим этилди.
Маълумот учун, Ўзбекистонда декабрь ойининг иккинчи якшанбаси қишлоқ хўжалиги ходимлари куни этиб белгиланган.
Изоҳ (0)