Sherzod Shermatov va Ravshan Ermatov bolalar futbolini rivojlantirish bo‘yicha hamkorlik qiladi

6-dekabr, juma kuni xalq ta’limi vaziri Sherzod Shermatov O‘zbekiston Futbol Assotsiatsiyasi birinchi vitse-prezidenti Ravshan Ermatovni qabul qildi.

XTV matbuot xizmatining xabar berishicha, uchrashuv davomida ular ikki tashkilot o‘rtasidagi bolalar futbolini rivojlantirish hamda ommalashtirish bo‘yicha hamkorlik masalalarini muhokama qildi.

Xususan, tomonlar maktab o‘quvchilari o‘rtasida muntazam ravishda futbol musobaqalarini o‘tkazishni rejalashtirib oldi. Ravshan Ermatovning ta’kidlashicha, ushbu turnirlarga yangi iste’dodlarni izlayotgan seleksionerlar tashrif buyuradi. Iqtidorli bolalar ixtisoslashtirilgan futbol maktablariga yuboriladi.

Sherzod Shermatov vazirlik ushbu yo‘nalishda O‘FA bilan hamkorlik qilishga tayyorligini ta’kidladi. Shuningdek, iqtidorli yoshlarning adolatli tanlanishini ta’minlash zarurligi va bu O‘zbekistonda futbol rivojiga xizmat qilishini aytib o‘tgan.

Qayd etilishicha, keyingi haftadan boshlab, O‘FA Xalq ta’limi vazirligi bilan hamkorlikda O‘zbekiston mintaqalarida futbol festivallari o‘tkazishni boshlaydi.