O‘zbekistonda sovuq kunlar boshlanganidan beri eng dolzarb muammo — energiya ta’minotidagi, xususan, elektr tarmoqlaridagi uzilishlar bo‘lib turibdi. Ushbu holat nafaqat ijtimoiy tarmoqlarda, balki rasmiy doiralarda ham faol muhokama qilinmoqda, energiya ta’minoti mutasaddilari muttasil tanqid qilinmoqda. “Daryo” muxbirlari hududlardagi elektr ta’minotidagi uzilishlariga e’tibor qaratdi.

Foto: "Daryo"

Qashqadaryo viloyati

Qashqadaryo viloyatining Chiroqchi tumanidagi Sho‘rbozor qishlog‘ida yashovchi aholining ijtimoiy tarmoqlardagi videomurojaatidan ma’lum bo‘lishicha, qishloqda elektr ta’minoti bo‘yicha muammo ko‘p. “Rossiyadan mehmon kelgan, ammo ‘svet’ yo‘q, ‘svet’siz mehmon kuzatyapmiz, hamma qorong‘uda o‘tiribdi. Mana, bolalar ham ‘svet’siz o‘tiribdi, dars qilolmayapti. Televizor ham ko‘rsatmaydi”, — deydi videomurojaat yo‘llagan chiroqchilik.

O‘z videomurojaatini ijtimoiy tarmoqqa joylagan chiroqchiliklar mas’ullardan suv va gaz bo‘lmasa ham, hatto ish va pul bo‘lmasa ham elektr bilan ta’minlab berishni so‘ragan. “Suv bo‘lmasa ham, gaz bo‘lmasa ham ‘svet’ berishsin”, – deydi videomurojaatdagi fuqaro. Xuddi shu qishloqda yashovchi yana bir fuqaroning videomurojaati esa davlat rahbari va energiya ta’minotiga mas’ul tashkilotlarga qaratilgan.

“Bizning yoshligimiz o‘tdi. Ammo mana bu bolalarimizning hayoti barbod bo‘lmasin. Ularning ham orzu-havaslari bor. Ularni ham xuddi o‘z bolangizdek ko‘ring, iltimos! Hurmatli Prezident, rahbarlarimiz, tasavvur qiling — farzandlaringiz shunday ahvolda o‘tirsa, sizga ma’qul bo‘larmidi? Agar bo‘lmaydigan bo‘lsa, ‘Bo‘lmaydi’, deb aytinglar, shunga qarab harakatimizni qilamiz”, — deb aytgan fuqaro o‘z videomurojaatida.

“Daryo” muxbiri Otabek Qo‘ldoshevning qo‘shimcha qilishicha, Qarshi tumani Bog‘obot mahallasida ham elektr toki tez-tez o‘chadigan bo‘lib qolgan.

Andijon viloyati

Andijon viloyatining deyarli barcha shahar va tumanlarida ham elektr energiyasi uzilishi bilan bog‘liq muammolar kuzatilmoqda. Andijon hududiy elektr tarmoqlari korxonasidan ma’lum qilishlaricha, uzilishlar belgilangan jadval asosida amalga oshirilmoqda. Murojaatlarning asosiy qismi Jalaquduq, Bo‘ston (Bo‘z), Paxtaobod, Ulug‘nor, Asaka, Buloqboshi, Shahrixon, Oltinko‘l tumanlaridan.

Misol uchun, Asaka shahri Tillaxon ko‘chasida yashovchi Akromjon Qosimov o‘zi yashayotgan hududda elektr energiyasi bir kunda yarim soatdan 8—9 marotaba o‘chirilayotganligidan noroziligini bildirdi, deya xabar bermoqda “Daryo” muxbiri Umidjon Mamarasulov.

“Mahallamizga ulangan transformator juda eskirgan, bundan tashqari yangi xonadonlar qo‘shilishi va ulovchilar soni keskin oshishi hisobiga quvvati yetmayapti. Mutasaddilarga bir necha marta murojaat qilganmiz. Har safar hal qilishga va’da berishadi. Ammo natija yo‘q. Achinarlisi, aholida elektr bo‘lmasa-da, mahalla hududida joylashgan Majburiy ijro byurosi idorasida tok doim mavjud. Xalq qorong‘uda o‘tirsa bo‘laveradiyu, MIBga mumkin emasmi?”, — deydi Akromjon Qosimov.

Buxoro viloyati

“Daryo” muxbiri Laylo Hayitovaning xabar berishicha, Buxoro viloyatida ham elektr tokida uzilishlar ko‘paygan. Ma’lum bo‘lishicha, viloyatning Peshku tumanida uzilishlar ayniqsa ko‘p. Tumanning Afshona, Sadir, Qo‘rg‘ontepa, So‘filar hududlarida har kuni soat 18:00 dan 20:00 gacha elektr toki berilmayapti. Mutasaddilar izohiga ko‘ra, uzilishlar aholining elektr energiyasidan ko‘p foydalanayotgani sabab yuz bermoqda.

Mutasaddilarning bunday bahonalariga aholining javob tayyor. “Shahar aholisi elektrda ishlovchi minglab texnika vositalaridan foydalanadi, lekin ular bunday muammolarga duch kelmaydi. Gazdan uzib qo‘yishgani kamdek endi elektr energiyasidan ham uzib qo‘yishyapti. Yana tezak, yana o‘tin. Muammolarimiz qachon yechim toparkin?”, — deydi ismini oshkor qilishni istamagan suhbatdosh.

Namangan viloyati

“Daryo”ning Namangan viloyatidagi muxbiri Azizbek Abduvaliyevning yozishicha, viloyatda 1-dekabrdan elektr ta’minotida birmuncha jonlanish kuzatilgan. Biroq transformator portlashi yoki sim uzilishi kabi holatlar tufayli yuz berayotgan avariyalarni bartaraf etishda sustkashlikka yo‘l qo‘yilmoqda. “Buni ijtimoiy tarmoqlarga bo‘layotgan ko‘plab murojaatlardan ham payqash mushkul emas”, — deydi Azizbek Abduvaliyev.

Namangan viloyatida elektr ta’minotidagi muammolar bo‘yicha murojaatlar Namangan shahri, To‘raqo‘rg‘on, Uychi va Chust tumanlarida nisbatan ko‘proq bo‘lmoqda. Namangan hududiy elektr tarmoqlari korxonasi murojaatlarning ko‘payishiga elektr energiyasi tizimiga yuklamalarning haddan tashqari ortib ketgani va avariya holatlarining oldini olish maqsadida qo‘llanayotgan cheklovlar sabab bo‘layotganini tan oldi.

Ayni vaqtda korxona vaqtinchalik uzilishlar haqida aholini OAV hamda ijtimoiy tarmoqlar orqali oldindan ogohlantirib bormoqda.

Xulosa o‘rnida

Eslatib o‘tamiz, 27-noyabr kuni bosh vazir Abdulla Aripov raisligidagi energiya ta’minotidagi muammolarga bag‘ishlangan yig‘ilish o‘tkazib, soha mutasaddilarini keskin tanqid qilgan edi. Xususan, hatto metropoliten faoliyati va teleuzatishlar vaqtida ham elektr uzilib qolishini bosh vazir “sharmandali holat” deya ta’riflagan edi. Ushbu selektordan ko‘p o‘tmay O‘zbekiston 1-dekabrdan boshlab Turkmanistondan elektr energiyasi import qilishi haqida xabar berildi.