Yuqorichirchiq tumanida Toshkent viloyati Ichki ishlar bosh boshqarmasi tomonidan DXX, FVV, Prokuratura, Milliy gvardiya va viloyat hokimligi bilan hamkorlikda yirik taktik-o‘quv mashg‘uloti o‘tkazildi. Bu haqda IIBB axborot xizmati xabar berdi.
Toshkent viloyati IIBB boshlig‘i polkovnik Tohir Aripov rahbarligida o‘tkazilgan amaliy mashg‘ulot rejasiga ko‘ra, 100 kishidan ortiq olomon tomonidan yuzaga keltirilgan ommaviy tartibsizlikni tezkor ravishda bartaraf etish lozim bo‘ladi.
Dastlab olomon orasiga ma’lumot to‘plash va ularni qay darajada qurollanganligini aniqlash maqsadida Ichki ishlar bosh boshqarmasining tezkor xodimlaridan iborat guruh yashirin ravishda kiritildi. Ular yetakchilarni aniqlab, olomon bilan birga harakatlandi. Shu jarayonda maxsus shtabga vaziyat haqida axborotlarni yetkazib borildi.
Vaziyat tahlilidan kelib chiqib ularga qarshi IIBB Jamoat tartibini saqlash boshqarmasi xodimlaridan iborat dastlabki to‘siq tashkil etilib, mas’ullar ishtirokida olomon yetakchilari bilan muzokara olib borildi.
Muzokaralar natija bermagach, mashg‘ulot rahbarining qarori bilan olomonni tarqatish va ularning yetakchilarini qo‘lga olishga qaratilgan maxsus bosqichga kirishildi. Bunda tezkor harakatlanuvchi maxsus otryad xodimlari olomonni qurshab, ularning yetakchilarini ajratib olish harakatlari tezkor bajarildi. Yetakchilarni ko‘ra olish va olomonni tarqatish rejasi muvaffaqiyatli yakunlandi.
Shundan so‘ng voqea joyida tashlab ketilgan portlovchi moddani zararsizlantirish maqsadida IIVning portlash xavfi bo‘lgan predmetlarni zararsizlantirish bo‘yicha maxsus otryadi harakatga tushirildi.
O‘quv mashg‘uloti yakunida tadbirda yo‘l qo‘yilgan kamchiliklar muhokama qilinib, erishilgan yutuqlar e’tirof etildi.
Izoh (0)