Sharg‘un shahrini 2020—2022-yillarda kompleks rivojlantirish rejalashtirilmoqda

Surxondaryo viloyatining respublika bo‘ysunuvidagi Sharg‘un shahrini 2020—2022-yillarda kompleks ijtimoiy-iqtisodiy rivojlantirish rejalashtirilmoqda. Bu haqdagi Vazirlar Mahkamasining qarori Qonun hujjatlari muhokamasi portaliga joylashtirildi.

Qaror loyihasiga muvofiq, Sharg‘un shahrida 2020—2022-yillarda bajariladigan asosiy tadbirlar sifatida quyidagilar belgilangan:

Birinchidan, Sharg‘un shahrining Bosh rejasini tanqidiy o‘rganib, yo‘l-transport infratuzilmasi, shoh ko‘chalar, ko‘p qavatli uylar qurilishi, parklar, bulvarlar, zamonaviy savdo markazlari, infratuzilma obyektlari va sanoat zonalarini joylashtirish masalalarini muhandislik tarmoqlari bilan birgalikda ko‘rib chiqib, takliflarni tayyorlash hamda yaqin 3—5 yillik shaharsozlik vazifalarini belgilab olish;

• arxitekturaviy qiyofani zamonaviylashtirish, ko‘p qavatli uy-joy fondini sifat jihatdan yaxshilash, kommunal xizmat ko‘rsatish tizimini tubdan takomillashtirish, aholiga sifatli kommunal xizmat ko‘rsatishni joriy etish;
• muhandislik-kommunikatsiya tarmoqlari, xususan ichimlik suvi va oqova suv tizimlarini qaytadan qurish, avtomobil yo‘llari va ichki ko‘chalar holatini yaxshilash, shahar ko‘chalaridagi mavzelarda tungi yoritish tizimlarini yangidan zamonaviy holatga keltirish;
• ichki va shaharlararo yo‘nalishlarda harakatlanuvchi jamoat transportlarining yangi yo‘nalishlarini tashkil etib, aholiga sifatli va qulay transport xizmatlarini ko‘rsatishni tashkil etish;
• transport xizmatlarini ko‘rsatuvchi yangi xususiy korxonalar tashkil etib, ularni moliyaviy qo‘llab-quvvatlash orqali zamonaviy jamoat transport vositalarini xarid qilish;

Ikkinchidan, shaharda ekologik muhitni yaxshilash, aholi salomatligiga salbiy ta’sirini kamaytirish choralarini ko‘rish, ko‘kalamzorlashtirish, daraxtlarni o‘tqazish va yashil maydonlar, gulzorlar tashkil etish tadbirlarini amalga oshirish;

• bunda, mazkur tadbirlarni amalga oshirish uchun shaharda ochiq va yopiq yer osti sug‘orish tizimlarini barpo etib, irrigatsiya tarmoqlarini bugungi kun talabida qayta tiklash;

Uchinchidan, ijtimoiy soha muassasalari holatini yaxshilash, binolarini ta’mirlash, hududlarini obodonlashtirish, jihozlarini yangilash, mutaxassislarning malakasini va xizmat madaniyatini oshirish orqali ko‘rsatiladigan xizmatlar sifatini keskin oshirib, bu sohada xususiy sektor ulushini ko‘paytirish;

• zamonaviy tibbiy xizmat ko‘rsatish klinikalari va tashxis markazlarini barpo etish;
• xotin-qizlarni turli kasblarga o‘rgatish hamda qizlarni hayot maktabiga tayyorlashga ixtisoslashgan o‘quv markazlari faoliyatini keng yo‘lga qo‘yish;

To‘rtinchidan, aholining ma’naviyati va madaniyatini o‘stirish bilan aloqador tizimli tadbirlarni amalga oshirish, xususan qarovsiz qolgan va zarur darajada foydalanilmay turgan madaniyat va san’at saroylarini yangidan ta’mirlab, soha uchun zarur bo‘lgan jihozlar bilan ta’minlash;

Beshinchidan, o‘sib kelayotgan yoshlarni sportga keng jalb etish uchun davlat umumta’lim maktablarida samarasiz foydalanilayotgan sport maydonlarida, sport zallarida davlat sherikchilik va boshqa asoslarda tashabbuskorlar, Yoshlar ittifoqi, Jismoniy tarbiya va sport vazirligi bilan hamkorlikda yoshlarni, shuningdek, o‘rta yoshdagi aholini sportga jalb etish;

Oltinchidan, shahar ichidan oqib o‘tuvchi suv bo‘yi hududlarini obodonlashtirish, aholi ko‘ngilochar maskanlarini, sayilgohlarni barpo etish;

• ko‘p qavatli uylar orasida sun’iy qoplamali futbol, basketbol maydonlari va maydonchalari, bolalar maydonchalari barpo etish hamda dam olish, hordiq chiqarish o‘rindiqlarini o‘rnatish;

Yettinchidan, aholining madaniy hordiq chiqarishi uchun zamonaviy parklar barpo etib, ularda zamonaviy ko‘ngilochar xizmat ko‘rsatish turlari tashkil etish;

Sakkizinchidan, aholining ish bilan bandligini oshirish hamda ishsizlik darajasini keyingi 3 yilda 5 foiz darajagacha pasaytirish maqsadida tadbirkorlarni jalb etgan holda sanoat va xizmat ko‘rsatish sohalarini, qishloq xo‘jaligi mahsulotlarini qayta ishlash tarmog‘ini jadal rivojlantirish;

• sanoat tarmoqlarini rivojlantirish uchun to‘g‘ridan to‘g‘ri xorijiy investitsiyalarni jalb etish hajmini keskin oshirish, mahalliy xomashyodan eksportbop mahsulot ishlab chiqarishni yo‘lga qo‘yish orqali shahar iqtisodiyotiga valyuta tushumini ko‘paytirish borasida samarali ishlarni tashkil etish;
• mavjud kichik sanoat zonalari ishtirokchilari faoliyatini qo‘llab-quvvatlab, yangi hududlarda istiqbolli loyihalarni joylashtirish yo‘li bilan sanoat zonalarini tashkil etish;

To‘qqizinchidan, soliqqa tortish bazasini kengaytirish orqali mahalliy budjetga daromadlar tushumini keskin oshirish.

Sharg‘un shahrini 2020—2022-yillarda kompleks ijtimoiy-iqtisodiy rivojlantirish chora-tadbirlari dasturini tasdiqlash ham rejalashtirilmoqda.

Qaror loyihasiga ko‘ra, Sharg‘un shahrida 15 ta arzon 5 qavatli ko‘p kvartirali uy qurish ham ko‘zda tutilgan.

Shuningdek, shaharda rivojlangan davlatlar tajribalari asosida xorijiy investorlarni jalb etgan holda zamonaviy istirohat bog‘i barpo etish ham rejalashtirilgan.