Buxoro shahridagi Labi hovuz majmuasi yaqinida joylashgan “2-Passaj” binosi devoridagi “BBS Travel” MChJ tomonidan Buxoro shahrini turistik avtobusda aylanish taklifi targ‘ib qilingan reklama banneri ijtimoiy tarmoqda bildirilgan fikrdan so‘ng, Madaniy meros departamenti Buxoro viloyati boshqarmasi va tegishli tashkilotlar xodimlari ishtirokida olib tashlandi. Bu haqda Buxoro viloyat hokimligi matbuot xizmati xabar berdi.
Ta’kidlanishicha, ko‘hna va hamisha navqiron shaharning tarixiy qismi xorijiy va mahalliy sayyohlarni eng ko‘p qiziqtirishi bilan birga, ijtimoiy tarmoqlarda eng ko‘p muhokamalar markazida bo‘layotgan hudud sanaladi. “Sanitariya-gigiyena holatidan tortib, sayyohlar uchun yaratilgan shart-sharoitga nisbatan yurtdoshlarimizning befarq emasligi hammamizni quvontiradi, albatta”, — deyiladi hokimlik xabarida.
Qayd etilishicha, shunday munosabat tufayli tizimdagi ba’zi muammolar yechim topmoqda, ahvol o‘nglanmoqda.
Xabarda aytilishicha, 20-noyabr kuni Telegram’dagi “Effekt Makarenko” kanalida Buxoroning eski shahar qismidagi, aniqrog‘i, “2-Passaj” binosidagi reklama banneri to‘g‘risida suratga izoh qoldirilgan.
Murojaat qanoatlantirildi, biroq biz qadimiy shahrimizga tashrif buyurayotgan sayyohlar va mehmonlar uchun qulaylik yaratishimiz, zarur bo‘lganda, ular uchun axborot manbalarini hozirlashimiz, mehmonxona va servis xizmatidan tortib, ularning safari marshrutigacha, hatto, yo‘llarda sanitar xonalarigacha muhayyo qilib, hammasi haqida “kaftdagidek”, ko‘rgazmali qurollar vositasida aniq-ravshan axborotga ega bo‘lishlari zarurligi xususida bosh qotirilayotgan bir paytda, reklama banneriga murosasizlik qilish ortiqcha ish emasmikan?! Axir, bu sayyohlar uchun oddiy ko‘rgazmali bir vosita-ku. Gap uni ilib qo‘yilgan joyiga taqalsa, “2-Passaj” nomi bilan davlat ro‘yxatiga olingan, aniqrog‘i, “Badriddin karvonsaroyi”ga tutash devordan o‘rin olgan bu bannerni olib tashlashdan oson ish bormi?! Ijtimoiy tarmoqlardagi “muallif”lar, ularga “axborot tashiyotgan”lar shu borada jiddiyroq bosh qotirsalar, maqsadga muvofiq bo‘lardi.Hokimlik tomonidan ma’lumot berilishicha, Buxoro shahrining Bahouddin Naqshband ko‘chasida joylashgan “2-Passaj” binosi Vazirlar Mahkamasining 2019-yil 4-oktabrdagi “Moddiy-madaniy merosning ko‘chmas mulk obyektlari milliy ro‘yxatini tasdiqlash to‘g‘risida”gi 846-sonli qaroriga asosan, Buxoro viloyatidagi madaniy meros obyektlari ro‘yxatiga kiritilgan. Bino davlat mulki hisoblanib, ayni paytda Buxoro shahar hokimligi balansiga olingan.Buxoro viloyati hokimligi matbuot xizmati
Izoh (0)