Бухоро шаҳридаги Лаби ҳовуз мажмуаси яқинида жойлашган «2-Пассаж» биноси деворидаги «BBC Travel» МЧЖ томонидан Бухоро шаҳрини туристик автобусда айланиш таклифи тарғиб қилинган реклама баннери ижтимоий тармоқда билдирилган фикрдан сўнг, Маданий мерос департаменти Бухоро вилояти бошқармаси ва тегишли ташкилотлар ходимлари иштирокида олиб ташланди. Бу ҳақда Бухоро вилоят ҳокимлиги матбуот хизмати хабар берди.
Таъкидланишича, кўҳна ва ҳамиша навқирон шаҳарнинг тарихий қисми хорижий ва маҳаллий сайёҳларни энг кўп қизиқтириши билан бирга, ижтимоий тармоқларда энг кўп муҳокамалар марказида бўлаётган ҳудуд саналади. «Санитария-гигиена ҳолатидан тортиб, сайёҳлар учун яратилган шарт-шароитга нисбатан юртдошларимизнинг бефарқ эмаслиги ҳаммамизни қувонтиради, албатта», — дейилади ҳокимлик хабарида.
Қайд этилишича, шундай муносабат туфайли тизимдаги баъзи муаммолар ечим топмоқда, аҳвол ўнгланмоқда.
Хабарда айтилишича, 20 ноябрь куни Telegram’даги «Эффект Макаренко» каналида Бухоронинг эски шаҳар қисмидаги, аниқроғи, «2-Пассаж» биносидаги реклама баннери тўғрисида суратга изоҳ қолдирилган.
Мурожаат қаноатлантирилди, бироқ биз қадимий шаҳримизга ташриф буюраётган сайёҳлар ва меҳмонлар учун қулайлик яратишимиз, зарур бўлганда, улар учун ахборот манбаларини ҳозирлашимиз, меҳмонхона ва сервис хизматидан тортиб, уларнинг сафари маршрутигача, ҳатто, йўлларда санитар хоналаригача муҳайё қилиб, ҳаммаси ҳақида «кафтдагидек», кўргазмали қуроллар воситасида аниқ-равшан ахборотга эга бўлишлари зарурлиги хусусида бош қотирилаётган бир пайтда, реклама баннерига муросасизлик қилиш ортиқча иш эмасмикан?! Ахир, бу сайёҳлар учун оддий кўргазмали бир восита-ку. Гап уни илиб қўйилган жойига тақалса, «2-Пассаж» номи билан давлат рўйхатига олинган, аниқроғи, «Бадриддин карвонсаройи»га туташ девордан ўрин олган бу баннерни олиб ташлашдан осон иш борми?! Ижтимоий тармоқлардаги «муаллиф»лар, уларга «ахборот ташиётган»лар шу борада жиддийроқ бош қотирсалар, мақсадга мувофиқ бўларди.Ҳокимлик томонидан маълумот берилишича, Бухоро шаҳрининг Баҳоуддин Нақшбанд кўчасида жойлашган «2-Пассаж» биноси Вазирлар Маҳкамасининг 2019 йил 4 октябрдаги «Моддий-маданий мероснинг кўчмас мулк объектлари миллий рўйхатини тасдиқлаш тўғрисида»ги 846-сонли қарорига асосан, Бухоро вилоятидаги маданий мерос объектлари рўйхатига киритилган. Бино давлат мулки ҳисобланиб, айни пайтда Бухоро шаҳар ҳокимлиги балансига олинган.Бухоро вилояти ҳокимлиги матбуот хизмати
Изоҳ (0)