Тошкент шаҳрида тез тиббий ёрдам хизматидаги Damas машиналари тўлиқ замонавий Ford машиналарига алмаштирилши ҳақида хабар берилган эди.
Соғлиқни сақлаш вазирлиги томонидан маълум қилинишича, 11,9 миллион доллар қийматидаги «Тошкент шаҳрида тез тиббий ёрдам хизмати фаолиятига замонавий ахборот-коммуникация технологияларини жорий этиш» лойиҳаси доирасида Хитойнинг Henan Costar Group компанияси томонидан замонавий ахборот коммуникация технологиялари ва тиббий асбоб-ускуналар билан жиҳозланган 150 та Ford русумли тез тиббий ёрдам реанимобили Ўзбекистонга етказиб берилади.
Ҳозирда дастлабки тўққизта автомобиль етказиб берилган. Йил якунига қадар яна 141 та тез тиббий ёрдам автомобили олиб келиниши режалаштирилган.
Хабар берилишича, ушбу тез тиббий ёрдам автомобилларининг салон қисмига замонавий видеокузатув камераси ўрнатилган бўлиб, бу шифокор томонидан масофадан (call-марказдан) аҳволи оғир беморлар учун керакли маслаҳат ва тегишли кўрсатмалар бериш имкониятини яратади.
Шунингдек, Huawei компанияси билан 155 миллион доллар қийматидаги «Республиканинг барча ҳудудларида тез тиббий ёрдам хизмати фаолиятига замонавий ахборот-коммуникация технологияларини жорий этиш» лойиҳасини амалга ошириш мақсадида хитойлик ҳамкорлар билан керакли маблағларни жалб этиш бўйича музокалар олиб борилмоқда. Лойиҳа доирасида респуибликанинг барча ҳудудларида тез тиббий ёрдам хизмати call-марказларини замонавий АКТ билан жиҳозлаш ва мавжуд тез тиббий ёрдам транспорти автопаркини янгилаш режалаштирилган.
Замонавий call-марказлари ишга туширилиши билан ҳам қатор муаммолар бартараф этилади. Айни пайтда Республика шошилинч тиббий ёрдам илмий марказининг Тошкент шаҳар тез тиббий ёрдам станциясининг call-марказида жорий таъмирлаш ишлари якунига етказилиб, Henan Costar Group компанияси томонидан етказиб берилган замонавий ахборот-коммуникация технологиялари ускуналарини ўрнатиш ишлари якунланмоқда.
Шунингдек, автоматлаштирилган тез тиббий ёрдам хизмати бошқарув тизими синов тарзида жорий этилиб, ҳозирда мазкур тизимдан фойдаланадиган ходимларни ўқитиш ишлари бошланмоқда. Жорий йилнинг 1 декабридан бошлаб Тошкент шаҳрида ушбу тизим тўлиқ ишга туширилади.
Бундан ташқари, кейинги босқичда мобил иловалар ишлаб чиқилади. Бунда беморнинг ўзи бевосита планшет ёки телефон орқали мурожаат қилиш имкониятига эга бўлади. Бу янгиликлар босқичма-босқич йўлга қўйилмоқда.
Бу каби қулайликлар туфайли ҳар бир чақириқни қайта ишлаш учун бир дақиқадан кам вақт сарфланади. Натижада тезкорликка эришилади. Аҳолига малакали ва замонавий тиббий хизмат кўрсатиш имконияти янада ортади, дейилади вазирлик хабарида.
Изоҳ (0)