Toshkent viloyatidagi “Paxta” neft bazasida neft mahsulotlarini qabul qilish, saqlash, tarqatish, kirim-chiqim hisobining yuritilishi yuzasidan o‘tkazilgan o‘rganishda jami 2,7 milliard so‘mlik kamomad aniqlandi. Bu haqda Energetika vazirligi axborot xizmati xabar berdi.
Ma’lum bo‘lishicha, neft mahsulotlari sig‘imlaridagi mahsulotning haqiqiy qoldig‘i bilan hisobxona qoldig‘i taqqoslanganda jami 300 million so‘mlik 32 tonna kamomad hamda 476 ming so‘mlik 83 kilogramm ortiqcha mahsulot mavjudligi aniqlangan.
Shuningdek, o‘rganish davrida 2019-yil 25-martidan — 10-oktabrga qadar iste’molchilarga yetkazib berilgan neft mahsulotlarini avtotarozi orqali xaridor haqidan urib qolish hisobiga 1,6 milliard so‘mlik 222,5 tonna neft mahsuloti o‘zlashtirilgan.
Bundan tashqari, jamiyatdagi 26-sig‘imda saqlanayotgan 111 468 kilogramm miqdordagi moyning sifati talabga muvofiq emasligi aniqlangan.
Aholiga xizmat ko‘rsatish va savdo bilan bog‘liq holatlarda ham kamchiliklar qayd etildi. Tekshiruv davomida neft mahsulotlarining iste’molchilarga yetkazib berilmaganligi aniqlandi. Bazaga kirishdagi avtomobil tarozilari qasddan o‘zgartirib qo‘yilgan hamda avtotsisternalar og‘irligi 140 kilogrammgacha kamaytirib ko‘rsatilgan.
Natijada so‘nggi yarim yil ichida qariyb 222,5 tonna turli xildagi neft mahsulotlari iste’molchilarga yetkazib berilmay o‘zlashtirilgan.
Ayni paytda mazkur neft bazasining faoliyatini tekshirish huquqni muhofaza qiluvchi organlar ishtirokida davom etmoqda.
Vazirlik matbuot xizmatining xabar berishicha, joriy yilning oktabr oyida “O‘zneftgazinspeksiya” mutaxassislari tomonidan “Qarshi neft bazasi” MChJ va unga qarashli filiallarning neft mahsulotlari sig‘imlaridagi mahsulotning haqiqiy qoldig‘i bilan hisobxona qoldig‘i taqqoslanganda hamda sifat tahlili uchun namunalar olinganda jami 11,5 milliard so‘mlik kamomad va ortiqcha mahsulot aniqlangan.
Jumladan, 220,3 million so‘mlik 38,4 tonna kamomad, 50,9 milliom so‘mlik 5,7 tonna ortiqchalik hamda 160,1 million so‘mlik 26,4 tonna asossiz hisobdan chiqarish, 514,6 million so‘mlik 97703 litr mahsulot sifati buzilganligi qayd etilgan.
Shuningdek, 7,5 milliard so‘mlik 3850 tonna neft mahsulotlarni “O‘zbekneftgaz” AJ ruxsatisiz AYoQShlarga imtiyozli narxlarda tarqatilgan.
Bundan tashqari, jamiyatga qarashli sig‘imlarda saqlanayotgan neft mahsulotlarning sifati o‘rganilganda, jami 514,6 million so‘mlik 97703 litr neft mahsulotining sifati buzilganligi ma’lum bo‘ldi.
Nazorat va tahlil natijalari bo‘yicha rasmiylashtirilgan hujjatlar huquqni muhofaza qilish organlariga taqdim etildi.
Izoh (0)