Kunning eng asosiy yangiligi: Tojikiston—O‘zbekiston chegarasidagi tojik postiga IShID jangarilari hujum qildi. Hujum oqibatida tojikistonlik bir harbiy va bir militsiya xodimi halok bo‘lgan. Terrorchilarning esa 15 nafari yo‘q qilingan, besh nafari qo‘lga olingan. IShID a’zolari deyilayotgan jangarilarning shuncha joy qolib, aynan O‘zbekiston chegarasidagi postga, tag‘in Toshkentda MDH maxsus xizmatlari rahbarlari uchrashuvi arafasida hujum qilgani juda bir g‘alati.

Tojikiston harbiylari tomonidan zararsizlantirilgan terrorchilar avtomobili.
Foto: Tojikiston IIV matbuot xizmati

Bugungi kun kechagisidan dahshatli: Kecha Qashqadaryoda 15 yoshli o‘quvchi qiz ona bo‘lib qolgani haqida yozilgandi, bugunning shov-shuvi — Toshkentda besh yashar qizini o‘ldirib, yoqib yuborgan ota-ona. Ular bu qilmishni sodir etgan vaqtda mast bo‘lgan. Jinoyat oradan bir haftadan ko‘proq vaqt o‘tib — onaning o‘zi: “Qizim yo‘qoldi”, deb ariza bilan murojaat qilganidan so‘ng fosh etilgan. Ayni vaqtda ota-ona hibsda, biroq ular nima uchun bolani o‘ldirgani hozircha noma’lum.

Farg‘ona vodiysiga radioaktiv falokat xavf solmoqda, deya bong urmoqda Reuters va Euronews. Qirg‘iziston janubi-g‘arbiy qismidagi Moylisoy shahri yaqinida dunyodagi eng yirik radioaktiv chiqindilar ombori joylashgan. Sovet davrida Moylisoy uran qazib olish va qayta ishlashdagi muhim markazlardan biri bo‘lgan. Aytishlaricha, Agar radioktiv chiqindilar Norin daryosiga oqib ketsa, bu vodiyning barcha aholisi uchun — xususan, o‘zbekistonliklar uchun ham yirik fojia bo‘ladi.

Sankt-Peterburg — o‘zbekistonliklar shahri! Shahar rasmiylarining so‘zlariga ko‘ra, 2019-yilda chet elliklarga ishlash uchun berilgan patentlarning 70 foizini O‘zbekiston fuqarolari olgan (bekordan-bekorga: “Sankt-Peterburgda 1 million o‘zbekistonlik bor!”, deb aytishmagan-da). Lekin Piterda hamma o‘zbeklar ham qonuniy ishlayotgani yo‘q — masalan, Budapesht ko‘chasida noqonuniy kazino ochgan 24 yoshli O‘zbekiston fuqarosi fosh etilgan.

O‘zbekistonda yana nima yangiliklar? Qashqadaryoda qor yog‘di. Surxondaryo va Qoraqalpog‘iston tomonlarda buxanka non narxi 2—2,5 ming so‘mgacha ko‘tarilib ketdi. Toshkentda ko‘p qavatli binolarni beton o‘rniga yog‘ochdan qurish taklif qilindi. Farg‘onadagi YTH oqibatida ikki o‘quvchi qiz halok bo‘ldi. Mamlakatda 10 oy davomida yuz bergan 10 mingga yaqin yong‘in oqibatida 100 ga yaqin odam qurbon bo‘ldi. Andijonda sinovdan o‘tkazish uchun IIB xodimlariga elektromobillar beriladi. Va yana Andijon — elektr energiyasidan salkam 4 million so‘m qarzi bor ayol MIB xodimini xoda bilan kaltakladi.

Jahonda-chi, nima gap? Aytishlaricha, IShIDning sobiq yetakchisi Al-Bag‘dodiy o‘limidan oldin cho‘ponlar libosida yurgan, Erdo‘g‘on esa Al-Bag‘dodiyning xotini ham hibsga olinganini ma’lum qildi. Yaponiya bosh vaziri ikki vazir iste’foga chiqqani uchun xalqdan kechirim so‘rabdi: “Ularni men tayinlagan edim, men javobgarman, kechiringlar!”, deb. Shimoliy Osetiyada o‘zbekistonlik erkak 7 yoshli qizning nomusiga tegdi. Qozog‘istonda esa uch o‘zbekistonlikning o‘limiga sababchi bo‘lgan haydovchi 5 yilga qamaldi. Va bitta ijobiy yangilik — o‘zbekistonlik imkoniyati cheklangan qizcha o‘z she’ri bilan Central Asia’s Got Talent hakamlarini ta’sirlantirdi (videosini ko‘ring albatta).

Ha-ya, aytmoqchi, Toshkent metropolitenidagi nomi o‘zgargan va o‘zgaradigan bekatlari haqidagi maqola hamda “Alpomish” dostonining 1020 yilligiga bag‘ishlangan testni ham o‘tkazib yubormang.