Eron yarim yil ichida fazogirlikka nomzodlarni sinovdan o‘tkazadi

Eron axborot va kommunikatsion texnologiyalari vaziri Javod Azari Jahromiy Qatardagi Smart City Expo ko‘rgazmasida bergan intervyusida yarim yil ichida mamlakatdagi birinchi fazogirlar guruhiga nomzodlar sinovdan o‘tkazilishini ma’lum qildi, deb yozmoqda “RIA Novosti”.

Avval Jahromiy Eronning kosmosga o‘z fazogirini uchirmoqchi ekani va bu vazifani amalga oshirishda xorij davlatlari bilan hamkorlikka tayyorligini bildirgan. Eron fazo agentligi rahbari Murtazo Baroriy Rossiya bilan fors kosmonavtini Xalqaro fazo stansiyasiga (XFS) chiqarish bo‘yicha muzokaralarga tayyorligini ma’lum qilgan.

“Biz XFSga boshqa xorij mamlakatlari, xususan, Rossiya bilan hamkorlikda eronlik fazogirni yuborish masalasini o‘rganmoqdamiz. Fazo bilan bog‘liq masalalar avval mamlakatda kun tartibiga qo‘yiladi, so‘ngra Rossiya bilan muhokama etiladi. Eron birinchi fazogirlar guruhi uchun tanlov e’lon qiladi. Nomzodlar olti oy ichida sinovdan o‘tkaziladi va guruh shakllantiriladi”, — deydi Jahromiy.

Vazir Eron XFSga shunchaki sayohatchi yo‘lovchilarni uchirmoqchi emasligi va fazoga ilmiy nuqtayi nazarga ega olimlar yuborilishiga urg‘u berdi.