Ijtimoiy tarmoqlarda rus tili fanidan va rus sinflarida malakali pedagog kadrlar yetishmasligi bo‘yicha kelib tushayotgan munosabatlarga Xalq ta’limi vazirligi munosabat bildirdi.
Vazirlik xabarida qayd etilishicha, haqiqatan ham Toshkent shahri va ayrim viloyat markazlarida ta’lim rus tilida olib boriladigan umumta’lim maktablarida malakali pedagog kadrlar yetishmaydi.
Respublika miqyosida umumiy o‘rta ta’lim maktablarida bir o‘qituvchiga o‘rtacha o‘quvchi soni 12,3 nafar bo‘lsa, ta’lim rus tilida olib boriladigan maktablarda bu ko‘rsatkich 25,6 nafarni tashkil qiladi.
Bundan tashqari, Toshkent shahri va boshqa joylarda umumta’lim muassasalari rahbarlarining e’tiborsizligi tufayli ta’lim rus tilida olib boriladigan maktab va sinflarda mutaxassis o‘qituvchilar va darsliklar yetishmasligiga qaramay, ota-onalar talab-istaklari asosida o‘quvchi va sinflar soni yildan yilga ortib bormoqda.
Bu muammoni bartaraf etish maqsadida Vazirlar Mahkamasi huzuridagi oliy ta’lim muassasalariga qabul bo‘yicha Davlat qabul komissiyasi tomonidan ta’lim rus tilidagi yo‘nalishlarga abituriyentlarni qabul qilish parametrlarini Xalq ta’limi vazirligi buyurtmasi asosida manzilli belgilash, ta’lim rus tilida olib boriladigan umumta’lim maktablari uchun ehtiyoj mavjud bo‘lgan fan yo‘nalishlariga qabul kvotalarini ko‘paytirish, respublika miqyosida ta’lim rus tilida olib boriladigan barcha umumta’lim maktablarining pedagog kadrlar salohiyati va o‘quvchilar bilim darajasini chuqur o‘rganib chiqib, talabga javob bermaydigan maktab va sinflar sonini kamaytirish va shu asosda strategiyani belgilash takliflari kiritilmoqda.
Izoh (0)