Ижтимоий тармоқларда рус тили фанидан ва рус синфларида малакали педагог кадрлар етишмаслиги бўйича келиб тушаётган муносабатларга Халқ таълими вазирлиги муносабат билдирди.
Вазирлик хабарида қайд этилишича, ҳақиқатан ҳам Тошкент шаҳри ва айрим вилоят марказларида таълим рус тилида олиб бориладиган умумтаълим мактабларида малакали педагог кадрлар етишмайди.
Республика миқёсида умумий ўрта таълим мактабларида бир ўқитувчига ўртача ўқувчи сони 12,3 нафар бўлса, таълим рус тилида олиб бориладиган мактабларда бу кўрсаткич 25,6 нафарни ташкил қилади.
Бундан ташқари, Тошкент шаҳри ва бошқа жойларда умумтаълим муассасалари раҳбарларининг эътиборсизлиги туфайли таълим рус тилида олиб бориладиган мактаб ва синфларда мутахассис ўқитувчилар ва дарсликлар етишмаслигига қарамай, ота-оналар талаб-истаклари асосида ўқувчи ва синфлар сони йилдан йилга ортиб бормоқда.
Бу муаммони бартараф этиш мақсадида Вазирлар Маҳкамаси ҳузуридаги олий таълим муассасаларига қабул бўйича Давлат қабул комиссияси томонидан таълим рус тилидаги йўналишларга абитуриентларни қабул қилиш параметрларини Халқ таълими вазирлиги буюртмаси асосида манзилли белгилаш, таълим рус тилида олиб бориладиган умумтаълим мактаблари учун эҳтиёж мавжуд бўлган фан йўналишларига қабул квоталарини кўпайтириш, республика миқёсида таълим рус тилида олиб бориладиган барча умумтаълим мактабларининг педагог кадрлар салоҳияти ва ўқувчилар билим даражасини чуқур ўрганиб чиқиб, талабга жавоб бермайдиган мактаб ва синфлар сонини камайтириш ва шу асосда стратегияни белгилаш таклифлари киритилмоқда.
Изоҳ (0)