Jizzax viloyatining Sharof Rashidov tumanida rahbarlik qilib kelayotgan Zoir Mirzayev Bosh vazir Abdulla Aripov rahbarligida o‘tayotgan Qashqadaryodagi yig‘ilishda viloyatning yangi hokimi sifatida tanishtirilishi kutilmoqda. Bu haqda yig‘ilishda qatnashgan “Daryo” manbasi xabar bermoqda.
Manbaga ko‘ra, viloyat hokimi hali tanishtirilmagan. Ammo Sharof Rashidov tumani hokimi Zoir Mirzayev yig‘ilishda qatnashyapti. Viloyatning bo‘shatilishi kutilayotgan 4 ta rahbari esa yig‘ilishda ishtirok etmayapti. Tadbirda Bosh vazir Abdulla Aripov so‘z olgach, zaldagi OAV xodimlari chiqarib yuborilgan.
Zoir Mirzayev Sharof Rashidov tumaniga hokim etib tayinlanishidan avval Bosh vazir o‘rinbosari hamda Qishloq va suv xo‘jaligi vaziri lavozimlarida faoliyat yuritib kelgan. 2018-yil oktabrida “Oqqo‘rg‘on voqeasi” sabab ishdan olinib, tuman hokimi sifatida ish boshlagandi.
Zoir Mirzayev 1968-yilda Samarqand viloyatida tug‘ilgan, hokim sifatidagi ish faoliyatini 2003-yil Jomboy tumanidan boshlagan. So‘ngra Samarqand shahar hokimi, 2010-yildan 2016-yilgacha esa Samarqand viloyati hokimi sifatida faoliyat ko‘rsatgan.